Koregaon News – महाराष्ट्र अंधश्रद्धा निर्मूलन समितीच्या संस्थापक कार्याध्यक्ष डॉ. नरेंद्र दाभोलकर यांच्या खुनाला १३ वर्षे पूर्ण होत असतानाच त्यांच्या हत्येमागील सूत्रधारांचा शोध घेऊन त्यांच्यावर तातडीने कारवाई करावी, अशी मागणी महाराष्ट्र अंधश्रद्धा निर्मूलन समितीच्या कोरेगाव शाखेच्यावतीने करण्यात आली. याबाबत शाखेच्या पदाधिकाऱ्यांनी प्रांताधिकारी प्रमोद कुदळे यांना आज (दि. २०) डॉ. नरेंद्र दाभोलकर स्मृती दिनानिमित्त निवेदन सादर केले.

डॉ. नरेंद्र दाभोलकर यांच्या खून प्रकरणाचा तपास सीबीआयने करुन पुणे विशेष न्यायालयात खटला दाखल केला होता. या प्रकरणात शरद कळसकर आणि सचिन अंदुरे यांना दोषी ठरवून शिक्षा झाली आहे. मात्र, खुनामागील सूत्रधार अद्याप मोकाट असल्याबद्दल समितीने तीव्र नाराजी व्यक्त केली. डॉ. दाभोलकर यांचा खून त्यांचे विचार संपविण्यासाठी केलेला सुनियोजित कट असल्याचे निरीक्षण न्यायालयाने नोंदविले असताना सूत्रधारांचा शोध घेण्यासाठी शासनाने तातडीने प्रयत्न करावेत,

अशी मागणी करण्यात आली. तसेच वीरेंद्रसिंह तावडे, संजीव पुनाळेकर व विक्रम भावे यांच्या सुटकेविरोधात सीबीआयने उच्च न्यायालयात तातडीने दाद मागावी, अशी मागणी समितीने केली. कॉ. गोविंद पानसरे, प्रा. एम. एम. कलबुर्गी आणि गौरी लंकेश यांच्या हत्येच्या प्रकरणातील सूत्रधारांवरही कारवाई व्हावी, अशी भूमिका मांडण्यात आली. देशभरातील वाढत्या बुवाबाजीच्या पार्श्वभूमीवर जादूटोणाविरोधी कायदा संपूर्ण देशात लागू करावा,

अशी तिसरी मागणीही करण्यात आली. समितीच्या पुढाकाराने महाराष्ट्रात जादूटोणाविरोधी तसेच सामाजिक बहिष्कारविरोधी कायदे करण्यात आल्याचे निवेदनात नमूद करण्यात आले. निवेदनावर शाखा सल्लागार चंद्रकांत रावसाहेब बर्गे, सौ. माणिक रघुनाथ हजारे, अध्यक्ष सुधाकर व्यंकटराव बर्गे, उपाध्यक्ष कृष्णात शंकरराव बर्गे, कार्याध्यक्ष हेमंत रामचंद्र जाधव, सरचिटणीस युवराज केंजळे, निधी संकलन कार्यवाह चारुदत्त उत्तम निदान, वार्तापत्र व प्रकाशन विभाग कार्यवाह अधिक बर्गे, नितीन बर्गे, आरती महेंद्र निदान, दीपावली, प्रशांत पाटील, कमलेश शिंदे, दत्तात्रय बर्गे, अभयसिंह भोसले आदींच्या स्वाक्षऱ्या आहेत.