Kolkata rape-murder – पश्‍चिम बंगालमधील बलात्कार आणि हत्या प्रकरणात त्या राज्यातील तृणमूल कॉंग्रेसचे सरकार अडचणीत सापडले आहे. राज्याच्या मुख्यमंत्री ममता बॅनर्जी यांच्यावर चौफेर टीका सुरू असताना आता त्यातच प. बंगालचे एक मंत्री उदयन गुहा यांनी केलेल्या एका विधानामुळे नवा वाद निर्माण झाला आहे. ममतांवर आरोप करणारे, त्यांच्याकडे बोट दाखवणाऱ्यांची बोटेच मोडा असे गुहा यांनी म्हटले आहे.

उदयन यांचा हा धमकीचा व्हिडिओ सोशल मीडियावर जोरदार व्हायरल झाला आहे. मात्र त्याची सत्यता पडताळली असल्याची पुष्टी अद्याप कोणाकडून करण्यात आली नाही. संबंधित व्हिडिओत गुहा असे म्हणताना दिसत आहेत की जे ममता बॅनर्जी यांच्यावर आरोप करत आहेत, त्यांच्याकडे बोट दाखवत आहेत आणि त्यांच्या राजीनाम्याची मागणी करत आहेत ते कधीही यशस्वी होणार नाहीत. मुख्यमंत्र्यांकडे बोट दाखवणाऱ्यांची बोटे मोडली जातील आणि चिरडली जातील.

उदयन गुहा यांचा हा व्हिडिओ बंगाली भाषेत आहे. त्यांच्या या विधानामुळे वाद निर्माण झाले आहे. तृणमूल कॉंग्रेसचेच खासदार अरूप चक्रवर्ती यांनीही कालच एक वादग्रस्त विधान केले होते. संप करणाऱ्या डॉक्टरांमुळे जर कोणा रूग्णाचा मृत्यू झाला आणि नागरिकांच्या संतापाचा उद्रेक झाला तर डॉक्टरांना आम्हीही वाचवू शकणार नाही असे ते म्हणाले होते.