KKR vs LSG Ajinkya Rahane statement on Pitch Curator in IPL 2025 : मंगळवारी झालेल्या चुरशीच्या सामन्यात केकेआरला एलएसजीविरुद्ध पराभव पत्करावा लागला. यानंतर, केकेआरचा कर्णधार अजिंक्य रहाणेने पिच क्युरेटरवर टीका केली. तो म्हणाला की जर तो काही बोलला तर वाद होईल. केकेआरला त्यांच्याच घरच्या मैदानावर तितकी मदत मिळत नाहीये. यामुळे, केकेआरच्या निवडीनुसार पिच क्युरेटर खेळपट्टी का तयार करत नाही? असे प्रश्न उपस्थित केले जात आहेत. तथापि, पिच क्युरेटरने म्हटले आहे की ते बदल करण्यास तयार आहेत, परंतु त्यांना केकेआरकडून कोणताही फिडबॅक मिळत नाही.

अजिंक्य रहाणे पिच क्युरेटरबद्दल काय म्हणाला?

कोलकात्यातील ईडन गार्डन्सचे पिच क्युरेटर सुजान मुखर्जी हे आधीच चर्चेत आहेत. मीडिया रिपोर्ट्समध्ये असे उघड झाले होते की, क्युरेटर मुखर्जी यांनी अजिंक्य रहाणेची फिरकीसाठी अनुकूल खेळपट्टी बनवण्याची विनंती स्वीकारली नाही. खेळपट्टी क्युरेटरबद्दल, अहवालात असेही म्हटले आहे की त्यांनी हे स्पष्ट केले आहे की “जोपर्यंत ते येथे आहेत तोपर्यंत खेळपट्टीत कोणतेही बदल होणार नाहीत.” नंतर मुखर्जी यांनी स्पोर्ट्स नाऊशी बोलताना सांगितले की, त्यांनी केकेआरला आवश्यक असणारी खेळपट्टी तयार करुन देण्यास नाकारलेले नाही.

 माझे फ्रँचायझीशी चांगले संबंध आहेत – सुजान मुखर्जी

पिच क्युरेटर सुजान मुखर्जी म्हणाले होते, “जेव्हा मी खेळपट्टी बनवतो तेव्हा मी असा खेळपट्टी बनवण्याचा प्रयत्न करतो, जो फिरकी आणि उसळी दोन्हीसाठी अनुकूल असेल. आम्ही त्यावर चर्चा केली आहे. स्वाभाविकच, जर केकेआर खेळाडूंनी माझ्याशी संपर्क साधला तर मी त्यांचे ऐकेन. माझे फ्रँचायझीशी चांगले संबंध आहेत. चंद्रकांत पंडित, अजिंक्य रहाणे, वेंकी म्हैसूर. रहाणेनेही माझ्याशी चर्चा केली आहे आणि मी त्यांचे ऐकतो, कारण मला फिडबॅक हवा आहे. मी लवचिक आहे आणि कडक नाही.”

हेही वाचा – PBKS vs CSK : पंजाबच्या विजयानंतर चहल-महावशच्या फोटोने खळबळ! नेमकं कारण काय?

मी काही बोललो तर गदारोळ होईल – अजिंक्य रहाणे

एलएसजी विरुद्धच्या सामन्यात जेव्हा खेळपट्टीने यजमान संघाला फारशी मदत केली नाही, तेव्हा रहाणेला त्याचे विचार मांडण्यास सांगण्यात आले. यावर माध्यमांशी बोलताना रहाणे म्हणाला, “मी काही बोललो तर वाद होईल. माध्यमांनी आधीच तो एक मोठा मुद्दा बनवला आहे. क्युरेटरला आधीच खूप प्रसिद्धी मिळाली आहे आणि मला वाटते की तो त्याचा आनंद घेत आहे. म्हणून मी येथे खेळपट्टीबद्दल काहीही बोलणार नाही आणि आयपीएलबद्दल बोलेन. त्यामुळे तुम्हा लोकांना जे काही लिहायचे ते लिहू शकता.”