Kieron Pollard : मुंबई इंडियन्सच्या गोटात मुख्य प्रशिक्षकपदाची नवी धुरा सांभाळताच वेस्ट इंडिजचा अष्टपैलू खेळाडू किरॉन पोलार्डने (Kieron Pollard) क्रिकेट वर्तुळात एक खळबळजनक निर्णय घेतला आहे. मुंबई इंडियन्सचा मुख्य प्रशिक्षक बनल्यानंतर काही वेळातच ३९ वर्षीय पोलार्डने दक्षिण आफ्रिकेच्या प्रतिष्ठेच्या ‘एसए२०’ (SA20) टी-२० लीगमधून अचानक माघार जाहीर केली.

आगामी हंगामासाठी झालेल्या लिलावात जोबर्ग सुपर किंग्सने पोलार्डवर (Kieron Pollard) १५ लाख दक्षिण आफ्रिकन रँडची यशस्वी बोली लावून त्याला संघात समाविष्ट केले होते. मात्र, पिवळी जर्सी घालून मैदानात उतरण्यापूर्वीच त्याने आपण या स्पर्धेत खेळू शकणार नसल्याचे जोबर्ग सुपर किंग्स व्यवस्थापनाला स्पष्ट कळवले आहे.

आयपीएलमधील सर्वात मोठी प्रतिस्पर्धी फ्रँचायझी असलेल्या चेन्नई सुपर किंग्सच्या मालकीच्या या संघात पोलार्ड जाणार असल्याने सर्वांचे लक्ष लागले होते. चेन्नई सुपर किंग्स आणि सर्व सुपर किंग्स फ्रँचायझींचे मुख्य कार्यकारी अधिकारी (सीईओ) कासी विश्वनाथन यांनीही पोलार्डच्या या निर्णयाला अधिकृत दुजोरा दिला असून, त्याने अनुपलब्धतेचे कारण दिल्याने आता संघ त्याच्या बदली खेळाडूचा शोध घेत असल्याचे सांगितले.

उल्लेखनीय बाब म्हणजे, पोलार्डने इतर फ्रँचायझीकडून खेळण्यास मुंबई इंडियन्स व्यवस्थापनाचा कोणताही आक्षेप नव्हता, तरीही त्याने हा निर्णय घेतल्याचे समजते.

जागतिक टी-२० लीगच्या इतिहासात किरॉन पोलार्डने मुंबई इंडियन्स सहभागी असलेल्या कोणत्याही स्पर्धेत आजवर दुसऱ्या फ्रँचायझीचे प्रतिनिधित्व केलेले नाही. गेल्या हंगामापर्यंत तो एसए२० मध्ये ‘एमआय केप टाऊन’चा भाग होता, परंतु यंदाच्या लिलावात एमआयने त्याच्यावर बोली न लावता शिमरॉन हेटमायरला पसंती दिली होती.

पोलार्डचा (Kieron Pollard) मुंबई इंडियन्ससोबतचा प्रवास २०१० पासून सुरू झाला आणि २०२२ पर्यंत तो खेळाडू म्हणून या संघाचा कणा राहिला. या १३ वर्षांच्या कार्यकाळात मुंबईला पाच आयपीएल चषक जिंकून देण्यात त्याचा मोलाचा वाटा होता. २०२३ च्या आयपीएलपूर्वी निवृत्ती घेतलेल्या पोलार्डने एमआय न्यूयॉर्कसाठी ३०, एमआय एमिरेट्ससाठी २५ आणि एमआय केप टाऊनसाठी १२ सामने खेळले आहेत.

मागील आयपीएल हंगामातील अत्यंत निराशाजनक कामगिरीनंतर मुंबई इंडियन्सच्या ताफ्यात मोठ्या फेरबदलांची नांदी सुरू झाली आहे. मुख्य प्रशिक्षक बदलून संघाने पोलार्डकडे नेतृत्व सोपवून पहिली मोठी खेळी खेळली आहे. आता आगामी हंगामात मुंबई इंडियन्सचा कर्णधारही बदलण्याची शक्यता वर्तवली जात असल्याने चाहत्यांमध्ये उत्सुकता अधिक वाढली आहे.