Sachin Tendulkar Viral Video on Homemade Food : क्रिकेटचा देव मानल्या जाणाऱ्या सचिन तेंडुलकर याने मैदानावर शेकडो ऐतिहासिक विक्रम रचले असले, तरी मैदानाबाहेरील त्याचा साधेपणा आजही जगभरातील चाहत्यांना भुरळ घालतो. नुकताच सचिनने आपल्या अधिकृत इन्स्टाग्राम अकाउंटवरून एक खास व्हिडीओ शेअर केला आहे. यामध्ये तो आपल्या घरी मोठ्या आवडीने जेवणाचा आस्वाद घेताना दिसत आहे. प्रदीर्घ क्रिकेट कारकिर्दीदरम्यान आंतरराष्ट्रीय दौऱ्यांवर असताना आईच्या हातच्या जेवणाची कशी तीव्र आठवण यायची, याबद्दल सचिनने या व्हिडीओत अत्यंत भावनिक शब्दांत आठवणींना उजाळा दिला आहे.

दौऱ्यावरून परतण्यापूर्वी २-३ दिवस आधीच आईकडे फर्माईश –

आपल्या प्रदीर्घ आंतरराष्ट्रीय कारकीर्दीच्या प्रवासात खेळाडूंना अनेक महिने घरापासून दूर राहावे लागायचे. अशा वेळी हॉटेलचे जेवण खावे लागत असल्याने घरच्या जेवणाची ओढ अधिक लागायची. सचिनने व्हिडिओमध्ये सांगितले की, परदेशी दौऱ्यांवर असताना त्याला आईच्या हातच्या अन्नाची सर्वाधिक आठवण यायची. घरी परतण्याच्या दोन-तीन दिवस आधीच तो फोन करून आईकडे आपल्या आवडत्या पदार्थांची खास फर्माईश नोंदवून ठेवत असे.

‘वरण-भात, साजूक तूप अन् कोळंबी’; अस्सल मराठी पदार्थांवर ताव –

 

View this post on Instagram

 

आपल्या नेहमीच्या दिलखुलास शैलीत ‘नमस्कार मंडळी’ म्हणत सचिन म्हणाला, “मी जेव्हा दौऱ्यावर जायचो, तेव्हा घरच्या अन्नाची प्रचंड आठवण यायची. घरी येण्यापूर्वी मी आईला वरण-भात, बटाट्याची भाजी, साजूक तूप आणि माझी सर्वात आवडती कोळंबीची भाजी (Prawns) बनवायला सांगायचो. या सर्व पदार्थांचा एकत्र आस्वाद घेण्याची मजा काही वेगळीच असते.” हाताने जेवण्यात जो खरा आनंद आहे, तो कशातच नाही, असेही त्याने नमूद केले.

हेही वाचा – Pakistan Pink Jersey : पाकिस्तानचा संघ हिरवा रंग सोडून मैदानात गुलाबी जर्सीत का उतरला? नेमकं कारण काय? जाणून घ्या

‘आईसारखी चव जगात कोणीच आणू शकत नाही’ –

आईच्या हातच्या चवीबद्दल बोलताना सचिन भावुक झाला. तो म्हणाला, “आई आता पूर्वीसारखा स्वयंपाक करत नाही; पण तिच्या हातच्या चवीची बरोबरी कोणीच करू शकत नाही, ते अशक्य आहे. तिने रेसिपी सांगितली असली आणि सर्वांनी हुबेहूब बनवण्याचा प्रयत्न केला, तरी ती मूळ चव येत नाही.” यानंतर त्याने पारंपरिक पद्धतीने वरण-भातावर साजूक तूप ओतून हाताने जेवणाचा मनसोक्त आनंद घेतला.