प्रभात वृत्तसेवा खालापूर – खोपोली नगरपालिका हद्दीतील यशवंत नगर परिसरातील रस्ते आणि गटारांच्या विकासासाठी एक कोटी रुपयांचा निधी आमदार महेंद्र थोरवे यांच्या माध्यमातून मंजूर झाला आहे. या विकासकामांचा भूमिपूजन सोहळा शनिवारी (दि. १) मोठ्या उत्साहात पार पडला.या प्रसंगी माजी उपनगराध्यक्ष कुलदिपक शेंडे, मोहन औसरमल, शहर प्रमुख संदीप पाटील, शिवसहकार शहर प्रमुख हरिश काळे, उपशहर प्रमुख दिनेश थोरवे, संजय दळवी, आरपीआय शहर अध्यक्ष नितीन वाघमारे, युवक शहर अध्यक्ष रूपेश रूपवते, संजय पाटील, राम पवार, अरूण सदाफुळे, प्रविण महाडीक यांच्यासह ग्रामस्थ मोठ्या संख्येने उपस्थित होते. आरपीआय युवक जिल्हाध्यक्ष प्रमोद महाडिक यांनी पाठपुरावा करून हा निधी उपलब्ध करून दिला. या वेळी बोलताना त्यांनी सांगितले की, यशवंत नगरच्या विकासाचे स्वप्न आपण पाहतो आणि आमदार थोरवे ते पूर्ण करतात. आमदार महेंद्र थोरवे यांनी, आमदारकीच्या दुसऱ्या पर्वातील पहिला निधी यशवंत नगरसाठी देण्याचा सन्मान मला मिळाला आहे. या भागातील अनेक वर्षांपासूनची प्रलंबित कामे आता पूर्णत्वास नेले जातील, असे सांगितले.
