Khopoli News- खालापूर तालुक्यासह खोपोली शहरात मंगळवारी सायंकाळी पाचच्या सुमारास परतीच्या पावसाने जोरदार हजेरी लावली. विजांच्या कडकडाटासह झालेल्या मुसळधार पावसाला सोसाट्याच्या वाऱ्याची साथ मिळाल्याने नागरिकांची मोठी धांदल उडाली. वादळी वाऱ्यामुळे अनेक ठिकाणी मोठी झाडे व फांद्या उन्मळून रस्त्यावर पडल्या,

तर काही ठिकाणी घरांवरील तसेच रस्त्याच्या कडेला लावण्यात आलेले पत्रे उडून गेल्याच्या घटना घडल्या. सुरुवातीला परिसरात ढगाळ वातावरण निर्माण झाले, त्यानंतर विजांचा कडकडाट आणि ढगांचा गडगडाट सुरू होऊन काही वेळातच पावसाचा जोर वाढला. पाऊस आणि वाऱ्याचा जोर सुमारे तासभर जाणवत होता.

खोपोली शहरातील चिंचवली, शेडवली, पटेलनगर, शिळगाव तसेच प्रमुख रस्त्यांच्या परिसरात अनेक झाडे उन्मळून पडली. काही ठिकाणी झाडांच्या फांद्या रस्त्यावर आल्याने वाहतुकीला अडथळा निर्माण झाला. वादळी वाऱ्यामुळे काही ठिकाणी विजेचे खांब व तारा कोसळल्याने वीजपुरवठ्यावरही परिणाम झाला.

खोपोलीतील लायन्स क्लबसमोर मुंबई-पुणे महामार्गावर नवनिर्मितीसाठी लावण्यात आलेले पत्रे वाऱ्याच्या तडाख्याने रस्त्यावर कोसळले. सुदैवाने या घटनेत कोणतीही दुर्घटना घडली नाही. अनेक रस्त्यांवर झाडे व फांद्या पडल्याने काही काळ वाहतूक बंद ठेवण्यात आली होती. परिस्थितीची माहिती मिळताच नगरपालिका अग्निशमन दल, हेल्प फाउंडेशनचे कार्यकर्ते तसेच सामाजिक कार्यकर्ते घटनास्थळी दाखल झाले.

त्यांनी झाडे व फांद्या हटवून रस्ते वाहतुकीसाठी खुले करण्यासह नागरिकांना आपत्कालीन मदत केली. वादळी वाऱ्यामुळे काही ठिकाणी विजेचे खांब कोसळल्याने वीजपुरवठाही खंडित झाला. माहिती मिळताच वीज वितरण कंपनीचे कर्मचारी घटनास्थळी दाखल झाले. कोसळलेले खांब उभारणे, तुटलेल्या तारांची पाहणी करणे आणि सुरक्षिततेच्या दृष्टीने आवश्यक उपाययोजना करण्याचे काम सुरू करण्यात आले.

पावसाची पर्वा न करता कर्मचारी वीजपुरवठा पूर्ववत करण्यासाठी काम करताना दिसून आले. दरम्यान, परिसरातील भात पीक सध्या उत्तम बहरले असून कापणीसाठी तयार होत आहे. मात्र अशाच प्रकारे जोरदार वारा आणि परतीचा पाऊस सुरू राहिल्यास तयार भात पिकाचे नुकसान होण्याची भीती शेतकऱ्यांकडून व्यक्त होत आहे. हातातोंडाशी आलेला घास वाया जाण्याची शक्यता निर्माण झाल्याने शेतकरी चिंतेत आहेत.