Baramati News- सप्टेंबर महिना संपत आला तरी बारामती तालुक्यातील जिरायती पट्ट्यात अद्यापही दमदार पावसाने हजेरी लावलेली नसल्याने मोराळे, कानडवाडी, वाकी, चोपडज, चौधरवाडी यांसह परिसरातील अनेक गावे तहानलेलीच आहेत. गेल्या दोन महिन्यांपासून पावसाने दडी मारल्याने शेतीसह पिण्याच्या व जनावरांच्या पाण्याचा प्रश्न दिवसेंदिवस गंभीर होत चालला आहे.

या भागातील सुमारे २०० ते २५० हेक्टर शेतीसाठी वरदान ठरणारा वाकीचा तलाव अक्षरशः कोरडा पडला आहे. सोमयाच्या तळ्यातही पाणीसाठा नसल्याने या जलस्रोतांवर अवलंबून असलेल्या शेतकऱ्यांसमोर मोठे संकट उभे राहिले आहे. तलाव व तळी कोरडी पडल्याने परिसरातील विहिरींची पाणीपातळीही खालावली असून अनेक विहिरी कोरड्या पडल्या आहेत.पाण्याअभावी उभी पिके वाळू लागली आहेत.

मका, कडवळ यासह या भागातील प्रमुख नगदी पीक असलेला ऊसही संकटात सापडला आहे. पिके वाचविण्यासाठी पाण्याची सोय होत नसल्याने काही शेतकऱ्यांनी उभा ऊस तसेच मका व कडवळ जनावरांसाठी चारा म्हणून वापरण्यास सुरुवात केली आहे. पाण्याअभावी उभा ऊस डोळ्यादेखत वाळत चालल्याने शेतकऱ्यांचे मोठे आर्थिक नुकसान होण्याची भीती व्यक्त होत आहे. दरम्यान, बाजरीच्या पिकालाही पावसाच्या दडीचा मोठा फटका बसला आहे.

वर्षभरासाठी धान्याची सोय व्हावी, या अपेक्षेने घेतलेले बाजरीचे पीकही आता वाळत चालल्याने पुढील वर्षभराच्या धान्याचा प्रश्न कसा भागवायचा, अशी चिंता शेतकऱ्यांना सतावत आहे. पावसाअभावी केवळ शेतीच नव्हे तर जनावरांच्या पाण्याचा प्रश्नही गंभीर झाला आहे. पाण्याचे स्रोत आटल्याने पशुधन जगविण्यासाठी शेतकऱ्यांना मोठी कसरत करावी लागत आहे. या परिस्थितीच्या पार्श्वभूमीवर परिसरातील शेतकऱ्यांनी उपमुख्यमंत्री सुनेत्रा पवार,

खासदार पार्थ पवार आणि खासदार सुप्रिया सुळे यांच्याकडे निवेदने देऊन या भागात चारा छावणी सुरू करावी व पुरंदर उपसा सिंचन योजनेच्या पाण्यातून वाकीचा तलाव तसेच परिसरातील तळी भरून देण्याची मागणी केली आहे. या जलसाठ्यांमध्ये पाणी उपलब्ध झाल्यास परिसरातील शेती तसेच जनावरांच्या पाण्याचा प्रश्न काही प्रमाणात सुटण्यास मदत होईल, अशी अपेक्षा शेतकऱ्यांनी व्यक्त केली आहे.

दोन महिन्यांपासून पाऊसच नाही
गेल्या दोन महिन्यांपासून पावसाने पाठ फिरवल्याने खरीप हंगाम धोक्यात आला असून, आता पिके वाचविण्याचे मोठे आव्हान शेतकऱ्यांसमोर उभे ठाकले आहे. त्यामुळे शासनाने या भागातील परिस्थितीची तातडीने पाहणी करून जिरायती पट्ट्यात दुष्काळसदृश परिस्थिती जाहीर करावी आणि तातडीने पाण्याची व्यवस्था करावी, अशी मागणी ग्रामस्थ व शेतकऱ्यांकडून जोर धरू लागली आहे.