सौंदर्याची परिभाषा गालावरची “खळी’ या एका शब्दात मांडता येते. सौंदर्य मापनाचे ते एक परिमाण आहे. गालावर खळी असेलेले स्त्री-पुरुष आकर्षक दिसतात. कारण स्मित हास्य करताच समोरच्याची दृष्टी गालावरच्या खळीवर खिळून राहते. बघणाऱ्यांचे भान हरपते. अशी काय जादू असते या खळीमध्ये?

लहान मुले-मुली या खळीत किती निरागस दिसतात. तरुण-तरुणीच्या गालावरील खळी लोभस वाटते. अनेक सिलेब्रिटींच्या गालावर खळी असल्याने ते उजवे ठरतात. शाहरूख खानच्या गालावरील खळीला तोड नाही, तर प्रीती झिंटाच्या गालावरील खळीला शब्द नाही.

शाहरूखचा हसरा चेहरा मनमोहक दिसतो, तर प्रीतीच्या चेहऱ्यावरून नजर हटत नाही. दीपिका पादुकोन आणि आलिया भट्टचे सौंदर्यही त्यांच्या गालावरच्या खळीत खळखळून हसते. शाळा, कॉलेजमधील काही तरुणी पुढील आयुष्यातही कायम स्वरूपी अनेकांच्या लक्षात राहतात, ते त्यांच्या गालावर पडणाऱ्या खळीवरून.

अनेक तरुणींची तर खळी हीच तिची ओळख बनते. मित्रांच्या गप्पांच्या मैफलीत तिचा उल्लेख “गालावर खळी पडते ती पोरगी’ असाच येतो. लग्न करताना अनेक मुले गालावर खळी पडत असलेल्या मुलीच्या शोधात असतात.

तर ज्यांच्या बायकोच्या गालावर खळी पडते असे नवरोबा अगदी चारचौघांत त्याच्या बायकोला असे काही मिरवतात की, सोबत ताजमहलच मिरवत आहेत. असो, आपल्या गालावर खळी पडत नसली तर दु:खी होण्याचे कारण नाही. कारण समोरच्या गालावरील खळी पाहूनही आपल्याला आनंद होतो, त्यातच समाधान मानावे.