Ketan Agarwal Murder Case – केतन अग्रवाल हत्या प्रकरणी अटक केलेल्या रितेश हंगे याचा कटात सक्रिय सहभाग असल्याचे प्राथमिक तपासात निष्पन्न झाले आहे. केतनची हत्या करण्यापूर्वी आरोपी चेतन चौधरी, सिया गोयल आणि रितेश हंगे यांनी त्याला कशाप्रकारे संपवायचे, याबाबत चर्चा केली होती. सुरुवातीला बाहेरील व्यक्तीद्वारे हत्या घडवून आणण्याचा प्रयत्न झाला होता.

नंतर हा पर्याय बाजूला ठेवून स्वतःच केतनला संपवण्याचे ठरविल्याची माहिती पोलिस अधिक्षक संदीपसिंह गिल्ल यांनी सोमवारी पत्रकार परिषदेत दिली. यावेळी गुन्हे अन्वेषण शाखेचे पोलीस निरीक्षक प्रमोद क्षीरसागर उपस्थित होते. रितेश हंगे (२३,रा.पुणे) हा चेतन चौधरीचा कॉलेज वर्गमित्र आहे. तो खासगी कंपनीत काम करत असून यापूर्वी बांधकाम, रिअल इस्टेट क्षेत्रातही कार्यरत होता.

तपासावेळी विविध व्यक्तींच्या जबाबांमध्ये त्यांचे नाव समोर आले. त्यानंतर त्याच्या हालचालींची माहिती, तांत्रिक पुरावे आणि फॉरेन्सिक विश्लेषणाच्या आधारे पोलिसांनी तपास पुढे नेला. केतनची हत्या झाल्यानंतर चेतन चौधरीने रितेशची भेट घेतली. भेटीदरम्यान चेतनने रितेशला गुन्ह्याची माहिती दिली का? याची पोलीस पडताळणी करत आहेत. हत्येवेळी रितेश लोहगड किल्ल्यावर उपस्थित होता का? याचाही तपास सुरू आहे.

घटनेवेळी लोहगड परिसरात उपस्थित असलेल्या काही व्यक्तींचे जबाब पोलिसांनी नोंदविले आहेत. उपलब्ध तांत्रिक पुरावे, जबाब, इतर आरोपींकडून मिळालेल्या माहितीची पडताळणी सुरू आहे. रितेशला केवळ संशयावरून अटक केली नसून त्याच्याविरुद्ध जबाब, तांत्रिक पुरावे उपलब्ध झाल्यानंतर कारवाई केल्याचे अधिक्षक गिल्ल यांनी स्पष्ट केले. गुन्ह्याची माहिती असणे आणि कटात सहभागी असणे याबाबत कायदेशीर कारवाईची तरतूद आहे.

डिलिट चॅट ठरले महत्त्वाचे
रितेश, चेतन आणि सियामधील डिलिट केलेले व्हॉट्स ॲप चॅट पोलिसांनी तांत्रिक पद्धतीने पुन्हा मिळवले. यामध्ये केतनला इजा करुन अपंग करण्याबाबत तसेच त्याच्याविरोधात कट रचण्याबाबत चर्चा झाल्याचे पुरावे मिळाले. केतनचे काय करायचे आणि त्याला कशाप्रकारे संपवायचे, याची चर्चा सुरू असताना यासाठी बाहेरील व्यक्तीची मदत घेण्याचाही विचार झाला होता. त्यासाठी परराज्यातील कॉन्ट्रॅक्ट किलरशी संपर्क साधण्याचा प्रयत्न केला गेला होता.