BJP News : केरळमधील ज्येष्ठ अभिनेते एस.देवन यांनी रविवारी भाजपला (BJP News) रामराम ठोकला. ते पक्षाचे प्रदेश उपाध्यक्ष म्हणून कार्यरत होते. त्यांचा निर्णय केरळमध्ये राजकीय प्रभाव निर्माण करण्यासाठी झटत असणाऱ्या भाजपसाठी मोठा हादरा ठरला आहे.

राजकारणात (BJP News) सक्रिय झालेल्या देवन यांनी केरळ पिपल्स पार्टीची स्थापना केली. त्यांनी केंद्रीय गृहमंत्री अमित शहा यांच्या शिष्टाईनंतर वर्ष २०२१ मध्ये त्यांचा पक्ष भाजपमध्ये विलीन केला. आता त्यांनी भाजपची ५ वर्षांची साथ सोडली आहे. भाजप समवेत कार्य करताना मी हवे ते उद्दिष्ट गाठू शकलो नाही.

माझा मार्ग वेगळा असल्याचे मला जाणवले. त्यातून मी चार-पाच महिन्यांपूर्वी विशिष्ट निर्णय घेतले. आत्मचिंतनानंतर मी अंतिम निर्णयांपर्यंत पोहचलो, असे त्यांनी एका मंदिरातील सोहळ्यात बोलताना नमूद केले. देशातील अनेक राज्यांत राजकीय दबदबा निर्माण करणारा भाजप अद्याप कर्नाटक वगळता दक्षिणेतील इतर राज्यांत प्रभाव निर्माण करू शकलेला नाही.

याआधी तमिळनाडूचे माजी प्रदेशाध्यक्ष के.अण्णामलाई त्या पक्षातून बाहेर पडले. आता केरळ प्रदेश उपाध्यक्ष पदाचा राजीनामा (BJP News) देत देवन यांनीही तसेच पाऊल उचलले आहे. केरळमधील ती महत्वाची राजकीय घडामोड ठरली आहे.