Kedarnath – उत्तराखंडमधील रुद्रप्रयाग जिल्ह्यातील प्रसिद्ध केदारनाथ मंदिराचे दरवाजे यंदा २२ एप्रिल रोजी भाविकांसाठी उघडले जाणार आहेत. महाशिवरात्रीच्या शुभ मुहूर्तावर उखीमठ येथील ओंकारेश्वर मंदिर येथे वैदिक विधी आणि पंचांग गणनेनंतर या तारखेची अधिकृत घोषणा करण्यात आली. यंदा मंदिराचे दरवाजे वृषभ लग्नात उघडले जाणार असून, धार्मिक दृष्ट्या हा मुहूर्त अत्यंत शुभ मानला जातो. मागील वर्षी २ मे २०२५ रोजी केदारनाथ धामचे कपाट उघडण्यात आले होते. मात्र, यावर्षी २२ एप्रिलला दरवाजे खुलणार असल्याने भाविकांना सुमारे १० दिवस आधीच बाबा केदारांचे दर्शन घेण्याची संधी मिळणार आहे. त्यामुळे यंदाच्या यात्रेला अधिक उत्साहाचे वातावरण आहे. तारीख जाहीर होताच राज्य शासन, प्रशासन आणि बद्रीनाथ-केदारनाथ मंदिर समितीने तयारीला वेग दिला आहे. पायी मार्गावरील बर्फ हटवणे, रस्त्यांची दुरुस्ती, सुरक्षा व्यवस्था मजबूत करणे तसेच यात्रेकरूंसाठी निवास, वैद्यकीय सुविधा आणि इतर सोयीसुविधा उपलब्ध करून देण्याचे काम युद्धपातळीवर सुरू आहे. यंदा यात्रा अधिक सुरक्षित आणि सुव्यवस्थित करण्यावर विशेष भर देण्यात येत आहे. कपाट उघडण्याच्या पारंपरिक प्रक्रियेनुसार १८ एप्रिल रोजी भगवान भैरवनाथांची विशेष पूजा-अर्चा केली जाईल. परंपरेनुसार भैरवनाथ हे धामचे क्षेत्रपाल देवता मानले जातात आणि त्यांच्या पूजेनंतरच यात्रेची औपचारिक सुरुवात होते. भगवान केदारनाथांची पंचमुखी डोली १९ एप्रिल २०२६ रोजी शीतकालीन गादीस्थळ उखीमठ येथून धामकडे प्रस्थान करेल. त्याच दिवशी डोली फाटा येथे पोहोचेल.
