Private Plane Crash : कर्नाटकच्या विजयपुरा जिल्ह्यात रविवारी दुपारी एक खासगी मिनी विमान कोसळल्याची घटना घडली. बालेश्वर तालुक्यातील मंगलुरु गावाजवळील मोकळ्या मैदानात हे विमान जोरात आदळले. अपघातात विमानाचे मोठे नुकसान झाले असले तरी सुदैवाने पायलट आणि दोन्ही प्रवासी सुरक्षित बचावले आहेत.

प्राथमिक माहितीनुसार, हवेत असतानाच विमानात तांत्रिक बिघाड झाल्याची शक्यता वर्तवण्यात येत आहे. नियंत्रण सुटल्याने हे विमान थेट मंगलुरु गावालगतच्या मोकळ्या शेतात कोसळले. जोरदार आवाज झाल्याने परिसरात भीतीचे वातावरण पसरले होते. आवाज ऐकताच स्थानिक नागरिकांनी तातडीने घटनास्थळी धाव घेत मदतीचा हात दिला.

मोठी जीवितहानी टळली

अपघातानंतर विमानाचा पुढील भाग आणि पंखांचे मोठ्या प्रमाणात नुकसान झाले आहे. मात्र विमानातील वैमानिक आणि प्रवाशांना कोणतीही गंभीर दुखापत झाली नसून, त्यांना सुरक्षित ठिकाणी हलवण्यात आले आहे. लोकवस्तीपासून दूर असलेल्या मोकळ्या मैदानात विमान कोसळल्यामुळे मोठा अनर्थ टळल्याचे प्रशासनाने सांगितले.

घटनेची माहिती मिळताच स्थानिक पोलीस व प्रशासकीय अधिकारी घटनास्थळी दाखल झाले. हे विमान कोणाचे होते, कुठून कुठे जात होते तसेच अपघाताचे नेमके कारण काय, याचा तपास नागरी विमान वाहतूक संचालनालयाकडून केला जाणार असल्याची माहिती मिळत आहे.