Karnataka minister viral video – बेंगळुरू शहरातील सर्वसामान्य बस प्रवाशांना कोणत्या अडचणींचा सामना करावा लागतो, हे जाणून घेण्यासाठी कर्नाटकचे परिवहन मंत्री बायराथी सुरेश यांनी शनिवारी रात्री मास्क घालून गुप्तपणे बसने प्रवास केला.

मात्र, मास्कमुळे त्यांना न ओळखल्याने बीएमटीसी बसच्या कंडक्टरने चक्क परिवहन मंत्र्यांनाच बसमधून उतरण्यास सांगितले. या घटनेनंतर संबंधित बस चालक आणि वाहकाला (कंडक्टर) तडकाफडकी निलंबित करण्यात आले आहे.

परिवहन मंत्री बायराथी सुरेश यांनी शनिवारी रात्री ७:१० ते ९:१० या वेळेत शहरातील हेब्बल ते नागशेट्टीहल्ली या मार्गावरील बसमध्ये प्रवास केला. सुरेश बसमध्ये चढले आणि त्यांनी दोन तिकिटे मागून कंडक्टरला १०० रुपयांची नोट दिली.

कंडक्टरने सुट्ट्या पैशांची मागणी केली. मंत्र्यांनी सुट्टे पैसे नसल्याचे सांगताच, सुट्टे पैसे देता येत नसतील तर बसमधून उतरून जा, असे उत्तर कंडक्टरने दिले. स्वतः परिवहन मंत्री असूनही त्यांनी तिथे कोणताही गोंधळ न घालता शांतपणे बसमधून उतरणे पसंत केले.

बस मधून उतरल्यानंतर मंत्र्यांनी नागशेट्टीहल्ली येथून एका ऑटो रिक्षाने प्रवास केला. तिथेही त्यांना वाईट अनुभव आला. ऑटोच्या मीटरवर ३० रुपये भाडे दिसत असताना, चालकाने मंत्र्यांकडे ३६ रुपयांची मागणी केली. मंत्र्यांनी विचारणा केली असता, चालकाने मीटर दुरुस्त करायचा आहे असे उत्तर दिले. शेवटी मंत्री त्याला ४० रुपये देऊन उतरले.

शहरातील जयमहल, आरटी नगर, सीबीआय रोड आणि मान्यता टेक पार्क यांसारख्या प्रमुख भागांमध्ये फिरून मंत्र्यांनी या सुविधांचा प्रत्यक्ष अनुभव घेतला. या धाडसी पाहणीनंतर शहरातील वाहतूक व्यवस्थेतील त्रुटी समोर आल्या असून, प्रशासनाने दोषींवर तात्काळ कारवाई केली आहे.