बंगळुरू : कर्नाटकचे उपमुख्यमंत्री डी.के.शिवकुमार यांचे समर्थक गुरूवारी कॉंग्रेस श्रेष्ठींच्या भेटीसाठी दिल्लीला रवाना झाले. त्यामुळे कर्नाटक कॉंग्रेसमध्ये सत्तासंघर्ष उफाळण्याचे संकेत मिळत आहेत. कर्नाटकात मे २०२३ मध्ये विधानसभा निवडणूक झाली. त्यामध्ये बाजी मारून कॉंग्रेसने त्या राज्याची सत्ता हस्तगत केली. मात्र, मुख्यमंत्रिपदावरून कोंडी निर्माण झाली. सिद्धरामय्या आणि शिवकुमार या तगड्या दावेदारांमुळे ती स्थिती उद्भवली. अखेर तोडगा काढत कॉंग्रेस श्रेष्ठींनी सिद्धरामय्या यांना मुख्यमंत्री, तर शिवकुमार यांना उपमुख्यमंत्री बनवले. तेव्हापासून सरकारच्या निम्म्या कार्यकाळानंतर कर्नाटकमध्ये मुख्यमंत्री बदल करण्याचे सूत्र ठरल्याचीही कूजबूज आहे. सरकारचा निम्मा म्हणजे अडीच वर्षांचा कार्यकाळ बुधवारी पूर्ण झाला. अशात सिद्धरामय्या यांनी मुख्यमंत्री बदलाची शक्यता फेटाळली. तसेच, मुख्यमंत्री म्हणून ५ वर्षांचा कार्यकाळ पूर्ण करणार असल्याचे भाष्य केले. दुसरीकडे शिवकुमार यांना बढती मिळण्याच्या आशेवर असणाऱ्या त्यांच्या समर्थकांमध्ये अस्वस्थता पसरली आहे. त्यातून शिवकुमार समर्थक असणाऱ्या काही आमदारांनी दिल्लीकडे कूच केल्याने भुवया उंचावल्या गेल्या आहेत. आणखी काही आमदारही लवकरच दिल्लीला जाणार असल्याची माहिती पुढे आली आहे. शिवकुमार यांना मुख्यमंत्री बनवण्याच्या मागणीसाठी त्यांच्या समर्थकांनी आक्रमक, आग्रही पवित्रा स्वीकारल्याचे सूचित होत आहे. त्यातून कर्नाटकमध्ये राजकीय हालचाली गतिमान बनण्याची चिन्हे आहेत.
