Karjat Accident – कर्जत-खोपोली महामार्गावरील पळसदरी येथील श्री स्वामी समर्थ मठाजवळ गुरुवारी (दि. ६) सकाळी सुमारे ८ वाजता झालेल्या भीषण अपघातात एका महिलेचा जागीच मृत्यू झाला, तर दुचाकी चालक गंभीर जखमी झाला आहे. या दुर्घटनेनंतर अर्धवट रस्ता आणि अपुऱ्या सुरक्षाव्यवस्थेबाबत नागरिकांनी तीव्र संताप व्यक्त केला आहे. मिळालेल्या माहितीनुसार, ताकई येथील मित्रांचा एक गट चारचाकीने माथेरानकडे जात होता.

पळसदरी येथील अरुंद रस्त्यावर चारचाकी वाहनाची रोहित वाघमारे यांच्या दुचाकीला जोरदार धडक बसली. या अपघातात दुचाकीवरील महिला गंभीर जखमी होऊन जागीच मृत्युमुखी पडली. गंभीर जखमी झालेल्या रोहित वाघमारे यांना स्थानिकांच्या मदतीने उपजिल्हा रुग्णालय, कर्जत येथे उपचारासाठी दाखल करण्यात आले. या प्रकरणी कर्जत पोलीस पुढील तपास करीत आहेत. स्थानिकांच्या म्हणण्यानुसार, कर्जत-खोपोली मार्गावरील अनेक ठिकाणी रस्त्याचे काम अद्याप अपूर्ण आहे.

काही ठिकाणी रस्त्याची रुंदी अचानक कमी होते. तसेच इशारा फलक, सुरक्षा बॅरिकेड्स आणि आवश्यक रस्ते चिन्हांचा अभाव असल्याने अपघातांचे प्रमाण वाढले आहे. शेतकऱ्यांना भूसंपादनाचा मोबदला अनेक वर्षांपासून न मिळाल्याने रस्त्याचे काम रखडल्याचा आरोपही स्थानिकांनी केला आहे. या मार्गावर यापूर्वीही अनेक अपघात झाले असून आणखी किती बळी गेल्यानंतर प्रशासन जागे होणार, असा संतप्त सवाल नागरिकांनी उपस्थित केला आहे.