Kangana Ranaut : अभिनेत्री आणि भारतीय जनता पक्षाच्या (भाजप) खासदार कंगना रणौत (Kangana Ranaut) पुन्हा एकदा आपल्या एका वादग्रस्त विधानामुळे राजकीय वर्तुळात चर्चेच्या केंद्रस्थानी आल्या आहेत. कंगनाने यावेळी काँग्रेसच्या ज्येष्ठ नेत्या सोनिया गांधी यांच्या राजकीय प्रवासावर आणि पार्श्वभूमीवर गंभीर प्रश्न उपस्थित केले असून, गांधी कुटुंबात घडलेल्या ऐतिहासिक घटनांना ‘योगायोगांची मालिका’ असे संबोधले आहे.

इन्स्टाग्राम पोस्टद्वारे उपस्थित केले गंभीर प्रश्न

आपल्या इन्स्टाग्राम स्टोरीवर मत मांडताना कंगनाने लिहिले, “सध्या सर्वत्र एका हनी ट्रॅप वादाची चर्चा सुरू आहे. मी स्वतः भारतीय राजकारण आणि आणीबाणीच्या काळातील गांधी कुटुंबाच्या इतिहासावर सखोल अभ्यास केला आहे. मला एका गोष्टीचे नेहमीच आश्चर्य वाटते की, एक रहस्यमय परदेशी व्यक्ती गांधी कुटुंबात कशी येते? त्यानंतर इंदिरा गांधी, संजय गांधी आणि राजीव गांधी जे सत्तेचे संभाव्य वारसदार किंवा उत्तराधिकारी होते त्यांचा एकापाठोपाठ एक मृत्यू होतो. अखेर सत्तेच्या केंद्रस्थानी फक्त एकच उमेदवार शिल्लक राहतो, तो म्हणजे परदेशी नागरिक सोनिया गांधी.”

कंगनाने (Kangana Ranaut) पुढे असा दावा केला की, “एकापाठोपाठ इतके योगायोग कसे जुळून आले, यावर लोकांना कधी संशय कसा आला नाही? इतकेच नाही तर त्या परदेशी महिलेने उघडपणे परदेशी अजेंड्याचा प्रचार केला आणि दहशतवाद्यांसाठी अश्रू ढाळले. तरीही त्यांनी २०१४ पर्यंत देशावर अनेक दशके राज्य केले.”

‘इमर्जन्सी’ ते ‘भारत भाग्य विधाता’

आपल्या ‘इमर्जन्सी’ चित्रपटाच्या संदर्भावर बोलताना कंगनाने स्पष्ट केले होते की, ती इंदिरा गांधींकडे केवळ राहुल गांधींच्या आजी म्हणून पाहत नाही. त्या देशाच्या माजी पंतप्रधान होत्या आणि त्यांचा इतिहास देशातील प्रत्येक नागरिकाशी जोडलेला आहे.

दुसरीकडे, २०१४ च्या लोकसभा निवडणुकीत देशाच्या राजकारणात मोठा बदल पाहायला मिळाला. नरेंद्र मोदी यांच्या नेतृत्वाखाली भाजपने २८२ जागांवर विजय मिळवून पूर्ण बहुमतासह सरकार स्थापन केले आणि काँग्रेस केवळ ४४ जागांवर घसरली. या निकालामुळे काँग्रेसच्या नेतृत्वाखालील ‘यूपीए’ची दहा वर्षांची सत्ता संपुष्टात आली.

कंगनाच्या (Kangana Ranaut) अभिनय कारकिर्दीचा विचार करता, ती ‘भारत भाग्य विधाता’ या नाट्यमय चित्रपटात मुख्य भूमिकेत दिसली होती. हा चित्रपट १२ जून रोजी प्रेक्षकांच्या भेटीस आला होता. २६/११ च्या मुंबई दहशतवादी हल्ल्याच्या वेळी आरोग्य कर्मचाऱ्यांनी दाखवलेले शौर्य आणि धैर्य या चित्रपटातून मांडण्यात आले होते.