Kamran Akmal on Pakistan Cricket : चॅम्पियन्स ट्रॉफी २०२५ मधील दारुण पराभवासाठी पाकिस्तानचा माजी क्रिकेटपटू कामरान अकमलने देशाच्या क्रिकेट शैलीला जबाबदार धरले आहे. स्पर्धेचे यजमान असूनही, पाकिस्तान केवळ गट टप्प्यातच बाहेर पडला नाही, तर दुबईला देण्यात आलेल्या अंतिम सामन्याचे आयोजन करण्याची संधीही गमावली. या सर्व प्रकरणावर कामरान अकमलने आपल्या यूट्यूब चॅनलवर प्रतिक्रिया दिली आहे.

कामरान अकमल काय म्हणाला?

आपल्या यूट्यूब चॅनलवरील एका व्हिडीओमध्ये म्हणाला कामरान अकमला म्हणाला की, चॅम्पियन्स ट्रॉफीच्या समारोप समारंभात पाकिस्तानचे प्रतिनिधित्व करू नये. कारण ते त्यास पात्र नव्हते. त्यानी जोर देऊन सांगितले की, लहान संघही यजमान देशाला आरसा दाखवण्यात यशस्वी झाले.

पाकिस्तानचा माजी क्रिकेटपटू कामरान अकमल म्हणाला, “आयसीसीने आम्हाला आरसा दाखवला आहे. स्पर्धेचे संचालक (सुमयर) उपस्थित होते आणि उपलब्ध होते, मग ते समारंभाला का उपस्थित राहिले नाहीत? कारण म्हणजे आपण तिथे असण्याच्या लायक नव्हतो. आपण चांगले क्रिकेट खेळत नाही आहोत. लहान संघांनीही आम्हाला आमचे वास्तव दाखवून दिले आहे.”

‘… तर आपल्याला असेच वागवले जाईल’ – कामरान अकमल

कामरान अकमल पुढे म्हणाला, “पाकिस्तानने स्पर्धेचे आयोजन कसे केले यावर कोणीही चर्चा केली नाही. जर आपण अशा प्रकारचे क्रिकेट खेळत राहिलो, तर आपल्याला असेच वागवले जाईल. जर तुम्ही फक्त स्वतःसाठी खेळलात तर तुम्हाला कोणताही आदर मिळणार नाही.” दरम्यान, चॅम्पियन्स ट्रॉफीच्या अंतिम समारंभात पीसीबीचा कोणताही अधिकारी का उपस्थित नव्हता हे स्पष्ट न केलेल्या आयसीसीच्या प्रतिसादावर पाकिस्तान क्रिकेट बोर्ड (पीसीबी) नाराज आहे.

पीसीबी प्रमुख मोहसीन नक्वी यांना मंचावर आणण्याची योजना होती –

चॅम्पियन्स ट्रॉफीच्या समारोप समारंभाला बीसीसीआयचे अध्यक्ष रॉजर बिन्नी, न्यूझीलंड क्रिकेट संचालक रॉजर टॉसी आणि आयसीसीचे अध्यक्ष जय शाह उपस्थित होते, परंतु यजमान देशाचा कोणताही अधिकारी व्यासपीठावर दिसला नाही. एनडीटीव्हीनुसार, पीसीबीच्या एका सूत्राने दावा केला की आयसीसीने पीसीबी प्रमुख मोहसीन नक्वी यांना मंचावर आणण्याची योजना आखली होती, परंतु त्यांच्या अनुपस्थितीमुळे योजना बदलण्यात आली.