Kalakar Katta – गुडलक चौकातील कलाकार कट्ट्यामुळे परिसरात सातत्याने वाहतूक कोंडी होत असून, वाहतुकीचा प्रश्न निर्माण होत असल्याने स्थानिक नागरिकांकडून हा कट्टा इतरत्र हलविण्याची मागणी प्रभाग क्रमांक २९ डेक्कन जिमखाना – हॅपी काॅलनीमधील भाजपच्या नगरसेवकांनी महापालिका आयुक्तांकडे निवेदनाद्वारे केली होती. मात्र, माहिती अधिकारातून मिळालेल्या उत्तरामुळे या मागणीवर प्रश्नचिन्ह निर्माण झाले आहे. वाहतूक पोलिस आणि डेक्कन पोलिस ठाण्याकडून माहिती अधिकारांतर्गत देण्यात आलेल्या लेखी उत्तरानुसार, कलाकार कट्ट्यामुळे गेल्या तीन वर्षांत मोठ्या प्रमाणात वाहतूक कोंडी झाल्याची कोणतीही नोंद नाही. या चौकात अधूनमधून लहान-मोठ्या स्वरूपाच्या तीन ते चार वेळा वाहतूक कोंडी झाल्याची नोंद आहे. तसेच, गेल्या तीन वर्षांत या कट्ट्याबाबत स्थानिक नागरिकांकडून कोणतीही तक्रार प्राप्त झाली नसल्याचेही पोलिसांनी स्पष्ट केले आहे. मात्र, त्याचवेळी या चौकात विविध राजकीय पक्षांची आंदोलने तसेच विद्यार्थी आंदोलने झाल्याने काही वेळा कायदा व सुव्यवस्थेचा प्रश्न निर्माण झाल्याचे उत्तरात नमूद केले आहे. राष्ट्रवादी काँग्रेसच्या सांस्कृतिक सेलचे अध्यक्ष बाबासाहेब पाटील यांनी याबाबत माहिती अधिकारांतर्गत अर्ज दाखल केला होता. कलाकार कट्ट्याबाबत स्थानिक नागरिकांच्या तक्रारी आहेत का, त्या कोणत्या स्वरूपाच्या आहेत, कट्ट्यामुळे कोणता गुन्हा किंवा अपघात झाला आहे का, कायदा व सुव्यवस्थेचा प्रश्न निर्माण झाला आहे का, मोठ्या प्रमाणात वाहतुकीस अडथळा निर्माण झाला आहे का किंवा वाहतूक कोंडी झाली आहे का, असे प्रश्न त्यांनी विचारले होते. त्यावर पोलिसांकडून ही उत्तरे देण्यात आली आहेत. राष्ट्रवादी-भाजप आमने-सामने या कलाकार कट्ट्याच्या मुद्द्यावरून भाजप आणि राष्ट्रवादी काँग्रेस आमने-सामने आली आहे. भाजपच्या स्थानिक नगरसेवकांनी या कट्ट्यामुळे पीएमपी बसला अडथळा होत असल्याचा तसेच वाहतूक कोंडी होत असल्याचा आरोप करीत तो स्थलांतरित करण्याची मागणी केली होती. तसेच, स्थानिक नागरिकांकडूनही कट्टा हलविण्याची मागणी होत असल्याचा दावा करण्यात आला होता. मात्र, कट्टा हलविण्याच्या निर्णयाला राष्ट्रवादी काँग्रेसने विरोध करीत कलाकारांसह त्या ठिकाणी आंदोलन केले होते. कट्टा स्थलांतरित करू नये, अशी मागणी करण्यात आली होती.
