Kadamwakwasti murder case – कदमवाकवस्ती (ता. हवेली) येथे चारित्र्याच्या संशयातून पतीने पत्नीच्या डोक्यात दगड घालून गंभीर जखमी केल्याची घटना घडली होती. या घटनेत गंभीर जखमी झालेल्या महिलेने चार दिवस मृत्यूशी झुंज दिल्यानंतर सोमवारी सकाळी पुण्यातील ससून रुग्णालयात उपचारादरम्यान अखेरचा श्वास घेतला. या घटनेमुळे परिसरात हळहळ व्यक्त होत आहे. शीतल शरद वारे (वय 34) असे मृत महिलेचे नाव आहे.

याप्रकरणी तिचा पती शरद विठ्ठल वारे (वय 37, रा. पठारेवस्ती, कदमवाकवस्ती, लोणी काळभोर, ता. हवेली) याला लोणी काळभोर पोलिसांनी अहिल्यानगर जिल्ह्यातून अटक केली आहे. न्यायालयाने त्याला तीन दिवसांची पोलीस कोठडी सुनावली आहे. याबाबत गोरख संजय वारे यांनी लोणी काळभोर पोलीस ठाण्यात फिर्याद दिली आहे. गुरुवारी रात्री शरद वारे हा मद्याच्या नशेत पत्नी शीतल हिच्याशी वाद घालत होता.

पत्नीच्या चारित्र्यावर संशय घेत त्याने तिला शिवीगाळ केली तसेच जीवे मारण्याची धमकी दिली. रात्री सुरू झालेला वाद शुक्रवारी पहाटे विकोपाला गेला. शुक्रवारी सकाळी साडेसहा वाजण्याच्या सुमारास आरोपीने शीतल यांच्या मोबाईलवरून गोरख वारे यांना फोन करून, दोघांमध्ये वाद झाल्याचे आणि आपण तिच्या डोक्यात दगड मारून गंभीर जखमी केल्याचे सांगितले. त्यानंतर त्याने फोन बंद केला.

घटनेची माहिती मिळताच नातेवाईकांनी घटनास्थळी धाव घेतली. गंभीर जखमी अवस्थेतील शीतल वारे यांना ससून रुग्णालयात दाखल करण्यात आले. त्यांच्या डोक्याला गंभीर दुखापत झाली होती आणि त्या बेशुद्ध अवस्थेत होत्या. अतिदक्षता विभागात चार दिवस उपचार सुरू असताना सोमवारी सकाळी त्यांचा मृत्यू झाला.घटनेनंतर आरोपी शरद वारे हा फरार झाला होता.

लोणी काळभोर पोलिसांनी तातडीने शोधमोहीम राबवून तांत्रिक माहिती, मोबाईल लोकेशन आणि गोपनीय माहितीच्या आधारे त्याचा माग काढला. अखेर त्याला अहिल्यानगर जिल्ह्यातून ताब्यात घेण्यात आले. आरोपीला न्यायालयात हजर केले असता न्यायालयाने तीन दिवसांची पोलीस कोठडी सुनावली.