Justin Trudeau Resigns । कॅनडाच्या पंतप्रधानपदाचा जस्टिन ट्रुडो यांनी अखेर राजीनामा जाहीर केला आहे. आता नवीन पंतप्रधानाची निवड होईपर्यंत ट्रुडो हेच काळजीवाहू पंतप्रधान म्हणून काम पाहणार आहेत. जस्टिन ट्रुडो यांनी एकाएकी राजीनामा दिला नाही तर त्यांच्या राजीनाम्यामागे अनेक कारणे आहेत ज्याचा दबाव ट्रुडो यांना सहन करणे शक्य झाले नाही. डोनाल्ड ट्रम्प यांच्या सततच्या ट्रोलिंगपासून ते त्यांच्याच लोकांच्या बंडखोरीपर्यंत सर्व गोष्टींचा यात समावेश केला जात आहे.

ट्रम्प यांच्या ट्रोलिंगने ट्रूडो नाराज Justin Trudeau Resigns । 

अमेरिकेची सूत्रे दुसऱ्यांदा हाती घेणारे डोनाल्ड ट्रम्प हे सतत जस्टिन ट्रुडो यांना ट्रोल करताना दिसले. अमेरिकेच्या अध्यक्षपदाची निवडणूक जिंकल्यानंतर ट्रम्प यांनी ट्रुडो यांना अमेरिकेच्या 51 व्या राज्याचे गव्हर्नर म्हणून संबोधित केले. ट्रम्प यांच्या विधानाचा सरळ अर्थ असा आहे की ते कॅनडाला अमेरिकेतील 51 वे राज्य मानतात. इतकेच नाही तर ट्रुडो जेव्हा अमेरिकेत ट्रम्प यांना भेटायला आले होते तेव्हा ट्रम्प यांनी भेटीचा फोटो शेअर केला होता आणि त्यातही त्यांनी ट्रुडो यांचे वर्णन ‘अमेरिकन स्टेट ऑफ कॅनडा’चे गव्हर्नर असे केले संबोधले गेले होते. ट्रम्प यांच्या वक्तव्यामुळे ट्रुडो यांच्यासमोर कॅनडामध्ये मोठा पेच निर्माण झाला होता. याशिवाय ट्रम्प यांनी कॅनडावर 25 टक्के शुल्क लागू करण्याची धमकीही दिली होती.

 पक्षातच बंडखोरी 

जस्टिन ट्रुडोच्या धोरणांमुळे त्यांच्याच पक्षाच्या नेत्यांना बंड करायला भाग पाडले. 2024 च्या शेवटच्या महिन्यांत ट्रूडोच्या मंत्रिमंडळात राजीनाम्याची लाट आली होती. 19 सप्टेंबर 2024 रोजी परिवहन मंत्री पाब्लो रॉड्रिग्ज यांनी राजीनामा दिला. 20 नोव्हेंबर 2024 रोजी अल्बर्टाचे खासदार रँडी बोईसोनॉल्ट यांनी राजीनामा दिला. 15 डिसेंबर 2024 रोजी, गृहनिर्माण मंत्री सीन फ्रेझर यांनी कौटुंबिक कारणांचा हवाला देऊन पुढील फेरबदलात मंत्रिमंडळ सोडण्याचा त्यांचा निर्णयजाहीर केला. 16 डिसेंबर 2024 रोजी क्रिस्टिया फ्रीलँड यांनी उपपंतप्रधान आणि अर्थमंत्री पदाचा राजीनामा दिला तेव्हा राजीनामा सत्राने मर्यादा गाठली गेली. एकामागून एक राजीनाम्यांचा धुमाकूळ सुद्धा ट्रुडो यांच्यावर दबाव आणत आहे.

वाढती महागाई, अयशस्वी अर्थव्यवस्था 

कॅनडामध्ये एकीकडे महागाई सातत्याने वाढत आहे, तर दुसरीकडे बेरोजगारीही वेगाने पसरत आहे. कॉन्झर्व्हेटिव्ह पक्षाने ट्रुडोच्या लिबरल पक्षाविरुद्ध हाच मोठा मुद्दा बनवला. कोविडनंतर, कॅनडातील बेरोजगारीचा दर सुमारे 6.5 टक्क्यांवर पोहोचला. कॅनडामध्ये घरांच्या किमती सातत्याने वाढत आहेत, ज्यामुळे सामान्य लोक ट्रूडोच्या विरोधात आहेत. गेल्या वर्षी डिसेंबर महिन्यात लिबरल पक्षात ट्रूडो यांच्या विरोधात बंडखोरीसारखी परिस्थिती पाहायला मिळाली होती. लिबरल पक्षाच्या 51 खासदारांनी एका बैठकीत सहमती दर्शवली आणि सांगितले की आता ट्रूडो यांनी त्यांचे पद सोडले पाहिजे.

आंतरराष्ट्रीय स्तरावरील बिघडलेले कॅनडाचे संबंध  Justin Trudeau Resigns । 

जस्टिन ट्रुडो यांच्या कार्यकाळात अनेक देशांशी कॅनडाचे आंतरराष्ट्रीय संबंध बिघडले. एकीकडे त्यांनी भारतावर निशाणा साधायला सुरुवात केली आणि दुसरीकडे इस्रायल आणि नेतान्याहू यांच्याबद्दल वक्तव्ये करत राहिले. कॅनडात खलिस्तानी दहशतवादी निज्जरच्या हत्येचा ठपका ट्रूडो यांनी थेट भारताच्या तपास यंत्रणांवर द्यायला सुरुवात केली. त्याच वेळी, ट्रुडो यांनी उघडपणे जाहीर केले की जर नेतान्याहू त्यांच्या देशात आले तर आंतरराष्ट्रीय गुन्हेगारी न्यायालयाच्या (ICC) वॉरंटनुसार त्यांना अटक करू. नेतन्याहूंवरील ट्रुडो यांच्या वक्तव्यामुळे अमेरिकेचे सिनेटर लिंडसे ग्रॅहम संतप्त झाले आणि त्यांनी ट्रूडो यांना धमकी दिली की कॅनडाने असे केल्यास अमेरिका त्यांची संपूर्ण अर्थव्यवस्था नष्ट करेल. अशा परिस्थिती कॅनडाचे आंतरराष्ट्रीय स्तरावर मोठ्या अर्थव्यवस्था असणाऱ्या देशांशी संबंध बिघडत गेले त्यामुळे त्याचा दबाव देखील ट्रुडो यांना राजीनामा देण्याचे एक कारण बनले असे मानले जात आहे.

दरम्यान ,  सोमवारी रात्री कॅनडाचे पंतप्रधान जस्टिन ट्रुडो यांनी पंतप्रधान पदाचा राजीनामा दिला आहे. राजीनाम्यानंतर त्यांची 10 वर्षे जुनी राजवट संपुष्टात आली. त्यातच आता नव्या पंतप्रधानाची निवड होईपर्यंत जस्टिन ट्रुडो हेच काळजीवाहू पंतप्रधान म्हणून कारभार पाहणार आहेत. तसेच त्यांच्या कार्यकाळात देशात झालेल्या उलथापालथीवर नव्याने निवडून येणाऱ्या पंतप्रधानांना तोडगा काढण्याचे मोठे आव्हान असणार आहे.