Junnar Crime- पुणे-नाशिक महामार्गावरील पिंपळवंडी (ता. जुन्नर) येथील कुकडी नदीच्या पुलावर तरुणाला अडवून मारहाण करण्यात आली. या प्रकारानंतर घाबरून पळताना पुलावरून खाली पडल्याने 24 वर्षीय तरुणाचा मृत्यू झाला. शुक्रवारी (दि. 9) मध्यरात्रीनंतर घडलेल्या या घटनेमुळे परिसरात खळबळ उडाली आहे. दुर्गाकुमार दिनेशप्रसाद गुप्ता (वय 24, मूळ रा. बिहार, सध्या रा. कांदळी, ता. जुन्नर) असे मृत तरुणाचे नाव आहे.

आळेफाटा पोलिसांनी दिलेल्या माहितीनुसार, दुर्गाकुमार हा मैत्रिणीला भेटून कांदळी येथील खोलीकडे पायी जात होता. पिंपळवंडी येथील एचपी पेट्रोल पंपासमोरील कुकडी नदीच्या पुलावर दुचाकीवरून आलेल्या दोघांनी त्याला अडवून विचारपूस केली. यावेळी झालेल्या वादातून त्याच्या कानशिलात मारण्यात आल्याचे तपासात निष्पन्न झाले. त्यानंतर घाबरलेला दुर्गाकुमार रस्त्याच्या पलीकडे जाण्यासाठी पळत असताना पुलावरून खाली पडला. गंभीर दुखापत झाल्याने त्याचा मृत्यू झाला.

घटनेची माहिती मिळताच आळेफाटा पोलिसांनी घटनास्थळी धाव घेत तपास सुरू केला. परिसरातील सीसीटीव्ही फुटेज, साक्षीदारांचे जबाब आणि गोपनीय माहितीच्या आधारे संशयितांचा शोध घेण्यात आला. या प्रकरणी सोहम दत्तात्रेय कुर्‍हाडे (वय 21, रा. लवणवाडी, आळे) आणि एका 16 वर्षीय विधिसंघर्षग्रस्त बालकाविरुद्ध गुन्हा दाखल करून कायदेशीर कारवाई करण्यात आली आहे.