नवी दिल्ली : बिहारमधील जमिनीच्या बदल्यात नोकरी दिल्याचा घोटाळा केल्याप्रकरणी आता मोठी बातमी समोर येत आहे. राजदचे प्रमुख लालू प्रसाद यादव, त्यांची पत्नी राबडी देवी यांच्यासह त्यांच्या परिवारातल्या काही सदस्यांची चौकशी सुरू होती. मात्र आता सर्व आरोपींना या प्रकरणी जामीन मंजूर करण्यात आला आहे. दिल्ली न्यायालयाने माजी रेल्वे मंत्री लालू प्रसाद यादव, बिहारच्या माजी मुख्यमंत्री राबडी देवी, त्यांची मुलगी-आरजेडी खासदार मीसा भारती आणि इतर आरोपींना जामीन मंजूर केला. सीबीआयने अटक न करता आरोपपत्र दाखल केल्याचे न्यायालयाने नमूद केले. न्यायालयाने प्रत्येक आरोपीला 50,000 रुपयांचे वैयक्तिक जामीन बॉण्ड आणि तेवढीच रक्कम जमा करण्याचे निर्देश असल्याचे सांगण्यात येत आहे. लालू प्रसाद यादव यांनी आपल्या रेल्वे मंत्रीपदाच्या काळामध्ये नोकरी देण्याच्या बदल्यात लोकांकडून जमिनी घेतल्याचा त्यांच्यावर आरोप आहे. याप्रकरणी सीबीआयने गेल्या वर्षी १८ मे रोजी लालू प्रसाद यादव यांच्याविरोधात तक्रार दाखल केली होती. त्यानंतर याच महिन्यात सीबीआयने राबडी देवी, त्यांची मुलगी आणि खासदार मीसा भारती यांच्या घरी छापेमारी केली. तसेच लालू प्रसाद यादव यांची चौकशीही केली. त्यानंतर लगेचच ईडीच्या पथकाने तेजस्वी यादव, त्यांचे नातेवाईक आणि निकटवर्तीयांच्या घरी छापेमारी करत मालमत्ता जप्त केली.
