Jijau Garden Ravet – रावेत येथील राजमाता जिजाऊ उद्यानात सार्वजनिक ठिकाणी मद्यपान केल्याचा प्रकार उघडकीस आल्याने उद्यानातील सुरक्षा व्यवस्थेबाबत नागरिकांनी चिंता व्यक्त केली आहे. कुटुंबे, ज्येष्ठ नागरिक आणि लहान मुलांची मोठी वर्दळ असलेल्या या उद्यानात घडलेल्या घटनेमुळे सुरक्षेचा प्रश्न पुन्हा ऐरणीवर आला आहे. एक व्यक्ती आपल्या कुटुंबासह उद्यानात आली होती.

त्याने थंडपेयामध्ये मद्य मिसळून उद्यानातील मनोऱ्याजवळील कट्ट्यावर बसून मद्यपान केल्याचे नागरिकांच्या निदर्शनास आले. याबाबत माहिती मिळताच गस्तीवर असलेल्या महिला पोलीस कर्मचाऱ्यांनी घटनास्थळी धाव घेत पाहणी केली. संबंधित व्यक्तीने फेकून दिलेली देशी दारूची बाटलीही हस्तगत करण्यात आली. या घटनेनंतर उद्यानातील सुरक्षा व्यवस्थेतील त्रुटी समोर आल्या आहेत.

उद्यानाच्या मुख्य प्रवेशद्वारावर सुरक्षा रक्षक नसल्याने येणाऱ्या-जाणाऱ्या व्यक्तींच्या सामानाची तपासणी होत नसल्याची बाब नागरिकांनी निदर्शनास आणली. त्यामुळे भविष्यात अशा प्रकारच्या घटना वाढण्याची भीती व्यक्त केली जात आहे. उद्यानातील काही भागांत गवत व झुडपे मोठ्या प्रमाणात वाढली असून नियमित देखभालीचा अभाव जाणवत आहे. काही ठिकाणी हिरवळ कोमेजलेली दिसत असून पाणीपुरवठा अपुरा असल्याची तक्रारही नागरिकांनी केली आहे.

“महानगरपालिकेच्या अखत्यारीत असलेल्या उद्यानांसाठी सुरक्षा रक्षकांची नियुक्ती ही महानगरपालिकेच्या सुरक्षा विभागामार्फत केली जाते. राजमाता जिजाऊ उद्यानासह सर्व उद्यानांमध्ये सुरक्षा व्यवस्था अधिक सक्षम करण्यासाठी संबंधित विभागाकडे सातत्याने पाठपुरावा सुरू आहे. प्रत्येक उद्यानासाठी तीन शिफ्टमध्ये सुरक्षा रक्षक उपलब्ध करून देण्याबाबत प्रस्तावित नियोजनावर काम सुरू असून नागरिकांच्या सुरक्षेला प्राधान्य देण्यात येत आहे. तसेच उद्यानांमधील इतर सुविधांबाबतही नियमित पाहणी करून आवश्यक ती कार्यवाही करण्यात येईल.”
– महेश गारगोटे, मुख्य उद्यान अधिक्षक, पिंपरी चिंचवड महानगरपालिका.