जेजुरीः राज्याचे मत्समंत्री नितेश राणे यांनी मांस विक्री करणाऱ्या दुकानाला मल्हार सर्टिफिकेशन नाव देण्याचा निर्णय घेतला आहे. या नावाला जेजुरीतील ग्रामस्थ मंडळाने विरोध दर्शविला असून, देवसंस्थानच्या पाच विश्वस्तांनी मंत्री नितेश राणे यांची भेट घेवून  समर्थन दिले होते. मल्हार सर्टिफिकेशनला विरोध व देवसंस्थानच्या विश्वस्त मंडळाचा निषेध करण्यासाठी ऐतिहासिक छत्री मंदिर परिसरात ग्रामस्थ मंडळाच्या बैठकीचे आयोजन करण्यात आले होते.

या बैठकीत मंत्री नितेश राणे व जेजुरी देवसंस्थानचा ग्रामस्थांकडून निषेध नोंदवण्यात आला. विश्वस्त मंडळाने भाविकांना सोयी सुविधा देण्यात ऐवजी राजकरण करू नये, विश्वस्त मंडळाने मल्हारी मार्तंड, तमाम भाविक व ग्रामस्थांची लेखी माफी मागावी अन्यथा गावबंदी घालण्याचा इशारा ग्रामस्थांनी दिला आहे. येत्या आठ दिवसात माफी न मागितल्यास विश्वस्तांना गाव बंदी करून गावबंदी करण्याचे या बैठकीत एकमताने ठरले. या बैठकीला जेजुरी ग्रामस्थ मोठ्या संख्येने उपस्थित होते.