Jaykumar Gore – गारळेवाडी, ता. खटाव येथील टेंभू उपसा सिंचन योजनेच्या सुधारित आराखड्यास महाराष्ट्र कृष्णा खोरे विकास महामंडळाकडून अधिकृत मान्यता मिळाली आहे. मंत्री जयकुमार गोरे यांच्या माध्यमातून ही सुधारित वाढीव तांत्रिक मान्यता प्राप्त झाली आहे. जलसंपदा मंत्री राधाकृष्ण विखे पाटील यांच्या दालनात दि. 10 जुलै रोजी झालेल्या बैठकीत, गारळेवाडी ग्रामस्थांच्या मागणीनुसार या सुधारित तांत्रिक आराखड्याची घोषणा करण्यात आली.

नवीन नियोजनानुसार पाइपलाइनच्या आकारमानात आणि तांत्रिक बदल करण्यात आले आहेत. या बदलांमुळे गव्हाण तलाव, दर्‍याचा तलाव, मदणे तलाव, झिरपी तलाव, भोकरनाळ तलाव व कलेढोण हद्दीतील एक तलाव अशा एकूण सहा तलावांमध्ये 23.5 दशलक्ष घनफूट इतके मुबलक पाणी साठवले जाणार आहे. या साठवणीमुळे गारळेवाडी व परिसरातील मोठ्या प्रमाणात क्षेत्र ओलिताखाली येणार असून, परिसरातील सिंचनाचा आणि पिण्याच्या पाण्याचा प्रश्न कायमचा सुटण्यास मदत होणार आहे.

ग्रामस्थांकडून जाहीर आभार
या महत्वपूर्ण योजनेची वाढीव सुधारित मान्यता मिळवल्याबद्दल गारळेवाडी ग्रामस्थांच्यावतीने पाणीदार आमदार जयकुमार गोरे यांचे जाहीर आभार मानून कृतज्ञता व्यक्त करण्यात आली. या कामासाठी गारळेवाडीचे सुपुत्र सेवानिवृत्त उपमुख्य कार्यकारी अधिकारी टी. आर. गारळे यांनी सातत्यपूर्ण मागणी व पाठपुरावा केला होता.

मारुतीशेठ गारळे, सरपंच अनिल गारळे आणि पोलीस पाटील धनाजी गारळे यांनी मोलाचे सहकार्य केले. हा सुधारित प्रस्ताव वेळेत मंजूर करून घेण्यासाठी परिश्रम घेणार्‍या टेंभू उपसा सिंचन योजनेच्या सर्व अभियंत्यांचे देखील गारळेवाडी ग्रामस्थांच्या वतीने विशेष आभार मानण्यात आले.