jantar mantar viral girl – दिल्लीतील जंतर-मंतर येथे कॉकरोच जनता पार्टीच्या विरोध प्रदर्शनादरम्यान पंतप्रधान नरेंद्र मोदी यांच्याविरोधात अपमानकारक टिप्पणी करणाऱ्या अल्पवयीन मुलीचा माफी मागणारा व्हिडीओ समोर आला आहे. मी केलेल्या कृत्याबद्दल मला प्रचंड लाज वाटत असून, ही माझी पहिली आणि शेवटची चूक आहे, असे सांगत या मुलीने संपूर्ण देशाची माफी मागितली आहे.

सोशल मीडियावर जारी केलेल्या व्हिडीओमध्ये मुलीने म्हटले आहे की मी माझ्या मित्रांसोबत सीपी (कनॉट प्लेस) येथे गेले होते, जिथे हे आंदोलन सुरू होते. तिथे मी कोल्ड ड्रिंक घेतले. तिथे अनेक गट तयार झाले होते, जे पंतप्रधानजींना शिवीगाळ करत होते.

मी सुद्धा त्या लोकांच्या चिथावणीला बळी पडले आणि ते सगळे बोलले. माझे वय सध्या अवघे १५ वर्षे आहे. मी जे केले ते माफीच्या योग्य नाही, मी खूप वाईट शब्द वापरले. पण ही माझी पहिली आणि शेवटची चूक असेल, यापुढे मी असे काहीही करणार नाही. मुलीने पुढे रडवेल्या स्वरात म्हटले की, मी संपूर्ण देशाची माफी मागते. मला इतकी लाज वाटत आहे की मी नजरही वर करू शकत नाही. कृपया मला माफ करा.

या प्रकरणी नोएडाच्या एक्सप्रेसवे पोलीस ठाण्यात झिरो एफआयआर दाखल करण्यात आला होता. घटनेचे ठिकाण दिल्ली असल्याने पुढील तपासासाठी हा एफआयआर नोएडा पोलिसांनी दिल्ली पोलिसांकडे सुपूर्द केला आहे. या प्रकरणात पोलीस नोंदी आणि मुलीच्या दाव्यात मोठा विरोधाभास समोर आला आहे.

नोएडा पोलिसांनी काल दिलेल्या माहितीनुसार, आरोपी महिलेचे नाव रुचिका सिंह असून तिचे वय २५ ते २८ वर्षांच्या दरम्यान आहे. मात्र मुलीच्या वकिलाने स्पष्ट केले आहे की, एफआयआरमध्ये नोंदवलेले नाव त्या मुलीचे नाहीच.

मुलीने स्वतःचे वय अवघे १५ वर्षे असल्याचे सांगितले आहे. ती आपल्या आईसोबत राहून शिक्षण घेते. मित्रांच्या सांगण्यावरून ती जंतर-मंतरवरील आंदोलनात गेली होती आणि तिथेच वाहवत जाऊन तिने पंतप्रधान मोदींविरोधात अभद्र भाषेचा वापर केला होता. या नाव आणि वयाच्या गोंधळामुळे पोलीस सध्या अधिक तपास करत आहेत.