Auqib Nabi County Championship Debut Surrey India Pacer New Zealand Tour Preparation : जम्मू-काश्मीरचा वेगवान गोलंदाज आकिब नबी (Auqib Nabi) इंग्लंडच्या प्रतिष्ठित काउंटी चॅम्पियनशिपमध्ये खेळण्यासाठी सज्ज झाला आहे. प्रसिद्ध काउंटी क्लब ‘सरे’कडून (Surrey) तो आगामी तीन सामन्यांसाठी मैदानात उतरेल. नोव्हेंबर महिन्यात होणाऱ्या भारतीय संघाच्या न्यूझीलंड कसोटी दौऱ्याची पूर्वतयारी म्हणून आकिबच्या या काउंटी प्रवासाकडे पाहिले जात आहे. शनिवारी आवश्यक ‘वर्क व्हिसा’ मिळताच तो तातडीने लंडनसाठी रवाना झाला असून, बुधवारी द ओव्हल मैदानावर यॉर्कशायरविरुद्धच्या सामन्यातून तो पदार्पण करण्याची शक्यता आहे.

रणजी मोसमात ६० विकेट्सचा धमाका; ऐतिहासिक जेतेपदाचा ठरला शिल्पकार –

यंदाचा देशांतर्गत हंगाम आकिब नबीसाठी अविस्मरणीय ठरला आहे. मार्च महिन्यात जम्मू-काश्मीरने जिंकलेल्या ऐतिहासिक पहिल्या रणजी ट्रॉफी जेतेपदात त्याचा मोलाचा वाटा होता. त्याने संपूर्ण हंगामात तब्बल ६० विकेट्स घेतल्या, ज्यात अंतिम सामन्यातील ५ विकेट्सचा समावेश होता. त्याने के. एल. राहुल, करुण नायर आणि हंगामात सर्वाधिक धावा करणाऱ्या आर. स्मरणसारख्या मातब्बर फलंदाजांना बाद केले होते. या दमदार कामगिरीच्या जोरावर आयपीएल २०२६ च्या लिलावात दिल्ली कॅपिटल्सने त्याला ८.४ कोटी रुपयांची मोठी बोली लावून आपल्या संघात घेतले होते.

न्यूझीलंड दौऱ्यासाठी बीसीसीआयची रणनीती; काउंटीचा अनुभव ठरणार फायदेशीर –

🚨 REPORTS 🚨

Auqib Nabi is set to play three matches for Surrey in the County Championship. 🏆

He is expected to make his debut on September 2 against Yorkshire.

(Source: Mohsin Kamal)#Cricket #India #County pic.twitter.com/XRJDHSegex

— Sportskeeda (@Sportskeeda) August 30, 2026

जसप्रीत बुमराहच्या दुखापतीमुळे आकिबला श्रीलंका दौऱ्यातील भारतीय कसोटी संघात ऐनवेळी संधी मिळाली होती, जरी त्याला प्रत्यक्ष प्लेइंग इलेव्हनमध्ये खेळता आले नाही. न्यूझीलंडमधील खेळपट्ट्यांवर उसळी आणि स्विंग गोलंदाजीला मदत मिळते. त्यामुळे त्या परिस्थितीशी जुळवून घेण्यासाठी इंग्लंडमधील काउंटी क्रिकेटचा अनुभव आकिबसाठी अत्यंत उपयुक्त ठरेल, असा विश्वास निवड समिती आणि संघ व्यवस्थापनाने व्यक्त केला आहे.

हेही वाचा – Womens Champions Trophy : आयसीसीचा श्रीलंकेला मोठा दणका! चॅम्पियन्स ट्रॉफीचे यजमानपद हिरावले, स्पर्धेतून बाहेर पडण्याची नामुष्की

सरे क्लबशी भारतीयांचे घट्ट नाते; भारत ‘ए’ मालिकेपूर्वी मायदेशी परतणार –

२२ सप्टेंबरपासून पुद्दुचेरी येथे ऑस्ट्रेलिया ‘ए’ विरुद्ध सुरू होणाऱ्या भारत ‘ए’ मालिकेपूर्वी आकिब मायदेशी परतेल. तसेच १ ते ५ ऑक्टोबरदरम्यान श्रीनगरमध्ये होणाऱ्या इराणी कपसाठीही त्याच्या नावाचा विचार केला जाईल. सरे क्लबकडून यापूर्वी साई सुदर्शन, महिपाल लोमरोर आणि राहुल चहर खेळले असून, आता आकिब नबीच्या रूपाने भारतीय वेगवान माऱ्याची ताकद काउंटीच्या खेळपट्ट्यांवर दिसणार आहे.