Jalna Accident : जालना जिल्ह्यातील जाफ्राबाद तालुक्यात भीषण अपघात घडला असून टिपर आणि दुचाकीच्या धडकेत वडील व त्यांच्या नऊ वर्षांच्या मुलाचा जागीच मृत्यू झाला आहे. तर 11 वर्षीय मुलगा गंभीर जखमी झाला आहे. या घटनेमुळे परिसरात हळहळ व्यक्त केली जात आहे. ही दुर्घटना जालना-देऊळगाव राजा मार्गावरील खामखेडा पाटीजवळ घडली. मिळालेल्या माहितीनुसार, विनोद उत्तम चव्हाण (वय 34) आणि त्यांचा नऊ वर्षांचा मुलगा युवराज चव्हाण यांचा अपघातात जागीच मृत्यू झाला. तर त्यांचा मोठा मुलगा शौर्य चव्हाण (वय 11) गंभीर जखमी झाला असून त्याच्यावर रुग्णालयात उपचार सुरू आहेत. अपघाताची तीव्रता इतकी मोठी होती की दुचाकीचा अक्षरशः चक्काचूर झाला. ही घटना खामखेडा पाटी परिसरात घडली असून जवळच पूर्णा नदीचा परिसर आहे. मृत विनोद चव्हाण हे कुंभारझरी गावचे रहिवासी होते. बाप-लेकाचा एकाच वेळी मृत्यू झाल्याने कुंभारझरी गावासह संपूर्ण जाफ्राबाद तालुक्यात शोककळा पसरली आहे. घटनेची माहिती मिळताच जाफ्राबाद पोलिसांनी तातडीने घटनास्थळी धाव घेतली. पोलिसांनी मृतदेह ताब्यात घेऊन शवविच्छेदनासाठी पाठवले असून घटनास्थळाचा पंचनामा करण्यात आला आहे. या प्रकरणी टिपर चालकाविरोधात काय कारवाई होते, याकडे सर्वांचे लक्ष लागले असून पोलीस अधिक तपास करत आहेत.