नवी दिल्ली – भारताच्या 19 वर्षांखालील मुलींच्या संघाने रविवारी 19 वर्षांखालील विश्‍वकरंडक स्पर्धा जिंकून इतिहास घडवला. आयसीसीने सुरू केलल्या या पहिल्याच स्पर्धेचे विजेतेपद मिळवल्याचा आनंद तर आहेच परंतू ही तर नव्या युगाची सुरूवात आहे, अशा शब्दात भारतीय संघाची कर्णधार शफाली वर्माने आपल्या भावना व्यक्त केल्या. भारतीय महिला क्रिकेट प्रगत होत असल्याचीच ही नांदी आहे येत्या काळात याच यशाची पुनरावृत्ती वरिष्ठ संघाकडूनही व्हावी यासाठी आम्ही सगळ्या खेळाडू सज्ज आहोत, असा निर्धारही शफालीने बोलून दाखवला.

रविवारी इंग्लंडला अंतिम सामन्यात अवघ्या 68 धावांवर रोखत भारतीय संघाने 7 गडी राखून विजय प्राप्त करत पहिलाच विश्‍वकरंडक उंचावला असून, सध्या सर्वच स्तरातून या संघाचे अभिनंदन करण्यात येत आहे. दरम्यान, अश्यातच बीसीसीआय सचिव जय शाह यांनी आणखी एक मोठी घोषणा केली आहे. स्वतः जय शाह यांनी ट्विट करत याबद्दल माहिती दिली आहे.

It is with great delight I share that Bharat Ratna Shri @sachin_rt and @BCCI Office Bearers will felicitate the victorious India U19 team on Feb 1st in Narendra Modi Stadium at 6:30 PM IST. The young cricketers have made India proud and we will honour their achievements.

— Jay Shah (@JayShah) January 30, 2023

जय शाह म्हणाले, ‘भारतरत्न सचिन तेंडुलकर आणि बीसीसीआयचे पदाधिकारी 1 फेब्रुवारी रोजी नरेंद्र मोदी स्टेडियमवर संध्याकाळी 6:30 वाजता भारताच्या अंडर-19 महिलांच्या क्रिकेट संघाला शुभेच्छा देतील. या युवा क्रिकेटपटूंनी भारताचे नाव रोशन केले आहे आणि आम्ही त्यांच्या या कामगिरीसाठी त्यांचा गौरव करणार आहोत.’ या आशयाचे ट्विट त्यांनी केलं आहे. तसेच बासीसीआयने या संघासाठी पाच कोटी रुपयांच्या बक्षीस रकमेची देखील घोषणा केली आहे.