नवी दिल्ली : उपराष्ट्रपती निवडणुकीसाठी मतदान सुरू असताना काँग्रेस पक्षाने पुन्हा एकदा माजी उपराष्ट्रपती जगदीप धनखड यांच्या मौनावर प्रश्नचिन्ह उपस्थित केले. काँग्रेसने म्हटले आहे की, माजी उपराष्ट्रपती गेल्या ५० दिवसांपासून असामान्य मौन पाळत आहेत आणि देश त्यांच्या बोलण्याची वाट पाहत आहे. जुलैमध्ये जगदीप धनखड यांनी अचानक राजीनामा दिल्यानंतर आज उपराष्ट्रपती निवडणुकीसाठी पुन्हा मतदान झाले आहे.

काँग्रेसचे सरचिटणीस आणि संपर्क प्रभारी जयराम रमेश यांनी लिहिले की, धनखड गेल्या ५० दिवसांपासून मौनात आहेत. आज, जेव्हा त्यांच्या उत्तराधिकारीपदाची निवडणूक प्रक्रिया सुरू आहे, तेव्हा देश त्यांच्या अभूतपूर्व आणि अनपेक्षित राजीनाम्यानंतर त्यांच्या विधानाची वाट पाहत आहे. मोदी सरकारकडून शेतकऱ्यांकडे केल्या जाणाऱ्या घोर दुर्लक्ष आणि सत्तेत असलेल्यांच्या अहंकारामुळे निर्माण झालेल्या धोक्यांबद्दल चिंता व्यक्त केल्यानंतर धनखड यांनी उपराष्ट्रपती पदाचा राजीनामा दिला होता.

काँग्रेस नेते सचिन पायलट यांनीही जगदीप धनखड यांच्या मौनावर प्रश्नचिन्ह उपस्थित केले. ते म्हणाले, उपराष्ट्रपती निवडणुका का होत आहेत? माजी उपराष्ट्रपती जगदीप धनखड कुठे आहेत? एनडीएला निवडणुकीत बहुमत सिद्ध करण्यासाठी कठोर परिश्रम करावे लागतील.