Jadhawadi News – वडाचा मळा ते बोलाई मळा परिसरात गेल्या तीन महिन्यांपासून मूलभूत नागरी सुविधांचा बोजवारा उडाला असून, तुंबलेल्या गटारी, साचलेले सांडपाणी आणि खड्डेमय रस्त्यांमुळे नागरिक त्रस्त झाले आहेत. वारंवार तक्रारी करूनही समस्यांकडे प्रशासनाकडून दुर्लक्ष होत असल्याने नागरिकांमध्ये तीव्र नाराजी व्यक्त होत आहे.परिसरातील अनेक गटारी वारंवार तुंबत असल्याने सांडपाणी रस्त्यावर साचत आहे.

त्यामुळे नागरिकांना दुर्गंधीचा त्रास सहन करावा लागत असून, डासांचा प्रादुर्भाव वाढण्याची भीतीही व्यक्त केली जात आहे. त्यातच रस्त्यांची मोठ्या प्रमाणात दुरवस्था झाली असून, ठिकठिकाणी मोठमोठे खड्डे पडले आहेत. या खड्ड्यांमुळे वाहनचालकांसह पादचाऱ्यांनाही मोठ्या अडचणींचा सामना करावा लागत आहे.

रात्रीच्या वेळी परिसरातील परिस्थिती आणखी बिकट होत असून, अपुरी प्रकाशव्यवस्था नागरिकांच्या सुरक्षिततेचा प्रश्न निर्माण करत आहे. विशेषतः महिला, ज्येष्ठ नागरिक आणि दुचाकीस्वारांना रात्रीच्या वेळी ये-जा करताना अडचणींचा सामना करावा लागत असल्याचे नागरिकांचे म्हणणे आहे.या समस्यांबाबत संबंधित प्रशासनाकडे वारंवार तक्रारी करूनही अद्याप ठोस उपाययोजना झालेली नाही.

‘निधी उपलब्ध नाही’ तसेच ‘ठेकेदार उपलब्ध नाही’ अशी कारणे प्रशासनाकडून सांगितली जात असल्याचा आरोप नागरिकांनी केला आहे. तीन महिने उलटूनही कामाला सुरुवात न झाल्याने प्रशासन नेमके कोणत्या मुहूर्ताची वाट पाहत आहे, असा सवाल उपस्थित केला जात आहे. राष्ट्रवादी युवा नेते विशाल आहेर यांनी या परिस्थितीबाबत नाराजी व्यक्त करत प्रशासनाने तातडीने परिसराची पाहणी करून गटारींची साफसफाई करावी,

रस्त्यांवरील खड्डे बुजवावेत आणि रात्रीची प्रकाशव्यवस्था सुधारावी, अशी मागणी केली आहे.“निधी आणि ठेकेदाराची कारणे न सांगता नागरिकांच्या मूलभूत प्रश्नांना प्राधान्य देऊन तातडीने प्रत्यक्ष काम सुरू करावे,” अशी भूमिका आहेर यांनी मांडली. तसेच प्रशासनाने तातडीने दखल न घेतल्यास नागरिकांच्या प्रश्नासाठी तीव्र आंदोलनाचा मार्ग स्वीकारावा लागेल, असा इशाराही त्यांनी दिला.