श्रीहरीकोटा – भारतीय अंतराळ संशोधन संस्था अर्थात इस्रोने मोठी झेप घेतली आहे. इस्रोने युरोपियन स्पेस एजन्सीच्या मदतीने प्रोबा-3 मिशन लाँच केले आहे. या मोहिमेमुळे सूर्याची अनेक रहस्य उलगडणार आहेत. 4 डिसेंबर 2024 प्रोबा-3 सॅटेलाइट अवकाशात झेपावणार होते.
मात्र, याचे प्रक्षेपण पुढे ढकलण्यात आले. इस्रोने आज म्हणजेच 5 डिसेंबर 2024 रोजी दुपारी 4:04 वाजता प्रोबा-3 सॅटेलाइट यशस्वीपणे प्रक्षेपित केले. श्रीहरिकोटा येथील सतीश धवन अंतराळ केंद्राच्या एक नंबरच्या लाँचिंग पॅड वरून पीएससीव्ही-एक्सएल या सर्वात शक्तीशाली रॉकेटद्वारे या सॅटेलाइटचे प्रक्षेपण करण्यात आले. अवकाशात झेपावल्यानंतर अवघ्या 26 मिनिटांत इस्रोचे रॉकेटने उपग्रहांना ठराविक कक्षेत पोहचवले.
सूर्याच्या कोरोनाचा अभ्यास करण्यासाठी मिशन हाती घेण्यात आले आहे. कोरोना हे सूर्याचे बाह्य वातावरण आहे. हा भाग सूर्याच्या पृष्ठभागापेक्षा जास्त गरम असतो. हे अंतराळ हवामानाचे स्त्रोत देखील आहे. प्रोबा-3 मिशनमध्ये दोन उपग्रह आहेत. एकाचे नाव कोरोनाग्राफ आहे. याचे वजन 310 किलो आहे. तर, दुसऱ्याचे नाव ऑकल्टर असे आहे. याचे वजन 240 किलो इतके आहे.
हे दोन्ही उपग्रह मिळून एक अनोखा प्रयोग करणार आहेत. ऑकल्ट उपग्रह सूर्याच्या डिस्कला कव्हर करणार आहे. यामुळे कोरोनाग्राफ उपग्रह सूर्याच्या कोरोनाचे स्पष्टपणे निरीक्षण करून याचा डेटा गोळा करणार आहे.
या तंत्रज्ञानामुळे सूर्याच्या कोरोनाचा अभ्यास करण्यात मदत होणार आहे. दोन्ही उपग्रह एकमेकांच्या वर एका निश्चित कक्षेत एकत्र ठेवलेले आहेत. या तंत्रज्ञानाचे यशस्वीरित्या प्रात्यक्षिक झाल्यास भविष्यातील अंतराळ मोहिमांसाठी नवीन मार्ग पर्याय उपलब्ध होणार आहेत.
