Buchi Babu cricket tournament 2024 : भारतीय क्रिकेट संघातून वगळलेला यष्टिरक्षक फलंदाज इशान किशन सध्या देशांतर्गत क्रिकेट खेळत आहे. इशान बुची बाबू स्पर्धेत झारखंडचा कर्णधार म्हणून स्पर्धेत सहभागी होत आहे. या स्पर्धेत इशानने मध्य प्रदेशविरुद्ध धमाकेदार शतक झळकावून देशांतर्गत क्रिकेटमध्ये शानदार पुनरागमन केले आहे. ईशानने 2023-24 मध्ये रणजी ट्रॉफीपासून स्वतःला दूर केले होते. रणजी हंगामात त्याने झारखंड राज्यासाठी सामने खेळले नाहीत. यानंतर बीसीसीआयने त्याला वार्षिक करारातून बाहेरचा रस्ता दाखवला होता.

बुची बाबू स्पर्धेत इशान किशन झारखंडचा कर्णधार आहे. त्याने 107 चेंडूत 10 षटकार आणि 5 चौकारांसह 114 धावांची खेळी केली. इशान 92 धावांवर फलंदाजी करत असताना त्याने सलग दोन षटकार खेचून आपले शतक पूर्ण केले. देशांतर्गत क्रिकेट खेळण्याशिवाय टीम इंडियात परतण्यासाठी इशान किशनकडे दुसरा मार्ग नव्हता. मात्र, भारतीय निवड समितीच्या सांगण्यावरून तो तामिळनाडूमध्ये लाल चेंडूचे क्रिकेट खेळला होता.

इशानने पुढील 50 धावा 37 चेंडूत केल्या पूर्ण…

एकवेळ झारखंडने मध्य प्रदेशविरुद्ध 108 धावांत 3 गडी गमावले होते. इशान किशन जेव्हा क्रीझवर पोहोचला तेव्हा त्याचा झारखंड संघ 113 धावांनी पिछाडीवर होता. यानंतर त्याने शतक झळकावून झारखंडला मजबूत स्थितीत आणले. आपली जबाबदारी समजून ईशानने 61 चेंडूत आपले अर्धशतक पूर्ण केले. यानंतर त्याने पुढच्या 50 धावा फक्त 37 चेंडूत केल्या. शंकर नगर येथील इंडिया सिमेंट मैदानावर झारखंड आणि मध्य प्रदेश यांच्यात सामना सुरू आहे. पहिल्या डावात मध्य प्रदेशने सर्वबाद 225 धावा केल्या आहेत.

Maharaja Trophy 2024 : राहुल द्रविडच्या मुलाचे टी-20 मध्ये पदार्पण, पहिल्याच सामन्यात ‘अशी’ राहिली कामगिरी…

म्हणून केंद्रीय करारतून वगळले…

भारतीय क्रिकेट नियामक मंडळाने इशान किशनला केंद्रीय करारातून काढून टाकले आहे. तो देशांतर्गत क्रिकेट खेळत नसल्याबद्दल बोर्डात प्रचंड नाराजी होती. त्याच्यासह इतर अनेक खेळाडू इंडियन प्रीमियर लीगसाठी देशांतर्गत क्रिकेट खेळत नव्हते. याबाबत बोर्डाने कडक भूमिका घेतली. आता भारतीय संघातील बहुतांश खेळाडू देशांतर्गत क्रिकेटमध्ये खेळत आहेत. नुकतीच दुलीप ट्रॉफी 2024 साठी संघाची घोषणा करण्यात आली आहे. यात शुभमन गिल, सूर्यकुमार यादव, रवींद्र जडेजा आणि शिवम दुबे यांच्यासह अनेक खेळाडू सहभागी होणार आहेत.

इशानचे टीम इंडियात पुनरागमनाकडे लक्ष…

बुची बाबू स्पर्धेत खेळल्यानंतर इशान किशन दुलीप ट्रॉफीमध्येही खेळणार आहे. या प्रथम श्रेणी स्पर्धेसाठीही त्याची निवड झाली आहे. श्रेयस अय्यरच्या नेतृत्वाखाली ईशान दुलीप ट्रॉफीमध्ये टीम इंडियासोबत खेळणार आहे. जिथे त्याची केएस भरतशी यष्टिरक्षक म्हणून कडवी स्पर्धा असेल. जर आपण इशानच्या आंतरराष्ट्रीय कारकिर्दीवर नजर टाकली तर त्याने भारतासाठी 32 टी-20 सामने खेळले आहेत. या कालावधीत त्याने 796 धावा केल्या आहेत. ईशानने 27 एकदिवसीय सामन्यांमध्ये 933 धावा केल्या आहेत. या फॉरमॅटमध्ये त्याने द्विशतकही झळकावले आहे. इशानने 2 कसोटी सामनेही खेळले आहेत.