मुंबई : आगामी मुंबई महानगरपालिका निवडणुकीच्या पार्श्वभूमीवर महाविकास आघाडी (मविआ) मधील एकजुटीवर प्रश्नचिन्ह निर्माण झाले आहे. काँग्रेस पक्षाने स्वबळावर निवडणूक लढवण्याचा नारा देत स्वतंत्र तयारी सुरू केल्याने राजकीय वर्तुळात खळबळ उडाली आहे. रविवारी मुंबई काँग्रेसतर्फे आयोजित जनसभेत आमदार अमीन पटेल आणि अस्लम शेख यांनी स्वबळाचा निर्धार व्यक्त केला, ज्यामुळे मविआच्या भवितव्याबाबत संभ्रम निर्माण झाला आहे.

काँग्रेसचा स्वबळाचा नारा –
मुंबई काँग्रेसच्या नेत्यांचे म्हणणे आहे की, मविआ अंतर्गत निवडणूक लढवल्यास पक्षाला कमी जागा मिळण्याची भीती आहे. शिवसेना (उद्धव बाळासाहेब ठाकरे) पक्षाकडे मुंबईत विद्यमान नगरसेवकांची संख्या जास्त असल्याने ते अधिक जागांची मागणी करू शकतात. यामुळे काँग्रेसच्या स्थानिक कार्यकर्त्यांना उमेदवारी मिळण्यात अडचणी येऊ शकतात. याच पार्श्वभूमीवर काँग्रेसने स्वतंत्र लढण्याचा विचार मांडला आहे. काँग्रेसचे आमदार अस्लम शेख यांनी एनडीटीव्ही मराठीशी बोलताना सांगितले, “शिवसेना (उबाठा) नेते संजय राऊत सातत्याने सांगतात की, इंडिया आघाडी आणि मविआ हे फक्त लोकसभा आणि विधानसभा निवडणुकांसाठी होते. स्थानिक स्वराज्य संस्थांच्या निवडणुकीसाठी प्रत्येकजण स्वतंत्र लढेल. त्यानुसार आम्हीही आमच्या तयारीला लागलो आहोत.” तथापि, अंतिम निर्णय दिल्लीतील काँग्रेस हाय कमांड घेईल, असेही त्यांनी स्पष्ट केले.

उद्धव-राज ठाकरेंच्या जवळिकीमुळे काँग्रेसची चिंता –
दुसरीकडे, शिवसेना (उबाठा) नेते उद्धव ठाकरे आणि महाराष्ट्र नवनिर्माण सेनेचे (मनसे) नेते राज ठाकरे यांच्यातील वाढती जवळीक काँग्रेससाठी चिंतेचा विषय ठरली आहे. नुकतेच ठाकरे बंधूंनी एकत्र येऊन मराठी अस्मितेचा मुद्दा उपस्थित केला होता. जर उद्धव आणि राज ठाकरे यांनी महापालिका निवडणुकीसाठी युती केली, तर काँग्रेसला मिळणाऱ्या जागांमध्ये आणखी घट होऊ शकते, अशी भीती काँग्रेस नेत्यांना आहे. त्यामुळे कार्यकर्त्यांना योग्य संधी देण्यासाठी स्वबळावर लढण्याचा विचार काँग्रेस करत आहे.

महायुतीची एकजूट, मविआत फूट?
महायुती गटातील भाजप, शिवसेना आणि राष्ट्रवादी काँग्रेस यांनी एकत्रितपणे निवडणूक लढवण्याचा निर्णय घेतला आहे. मात्र, मविआमधील काँग्रेसच्या स्वबळाच्या तयारीमुळे गटातील एकजुटीवर प्रश्नचिन्ह निर्माण झाले आहे. काँग्रेस नेते मुंबईत पक्षाची ताकद पुन्हा वाढवण्यासाठी स्वतंत्र लढण्यास उत्सुक आहेत. येत्या काही आठवड्यांत काँग्रेस हाय कमांड याबाबत अंतिम निर्णय घेणार असून, त्यानंतरच मविआच्या भवितव्याबाबत स्पष्टता येईल.

मराठी आणि मुस्लिम मतांवर परिणाम?
काँग्रेसच्या स्वबळाच्या निर्णयामुळे शिवसेना (उबाठा) ला मुस्लिम मतांच्या नुकसानाची भीती आहे. दुसरीकडे, उद्धव ठाकरे यांना मनसेच्या साथीने मराठी मतांमध्ये मजबुती मिळण्याची अपेक्षा आहे. यामुळे मुंबई महापालिका निवडणुकीच्या रणधुमाळीत नवे राजकीय समीकरण उदयास येण्याची शक्यता आहे. मुंबईतील राजकीय घडामोडींच्या पार्श्वभूमीवर ही निवडणूक अत्यंत चुरशीची ठरणार असल्याचे संकेत मिळत आहेत.