Laxman Sivaramakrishnan demands jail time for IPL players caught vaping : आयपीएल २०२६ च्या हंगामात मैदानातील खेळापेक्षा मैदानाबाहेरील वादांचीच अधिक चर्चा होताना दिसत आहे. राजस्थान रॉयल्सचा कर्णधार रियान पराग आणि पंजाब किंग्सचा लेग स्पिनर युझवेंद्र चहल यांचे ‘व्हेपिंग’ (ई-सिगारेट) करतानाचे व्हिडीओ समोर आल्यानंतर बीसीसीआयने शिस्तीचा बडगा उगारला आहे. या प्रकरणावर आता माजी भारतीय क्रिकेटपटू लक्ष्मण शिवरामकृष्णन यांनी अत्यंत कडक शब्दांत आपली प्रतिक्रिया नोंदवली आहे.

“थेट तुरुंगात पाठवायला हवे”

युझवेंद्र चहलचा विमानात ‘व्हेपिंग’ करतानाचा व्हिडिओ सोशल मीडियावर तुफान व्हायरल झाला आहे. हा व्हिडिओ अर्शदीप सिंiच्या एका पॉडकास्टशी संबंधित असल्याचे सांगण्यात येत आहे. जरी या व्हिडीओची सत्यता अद्याप सिद्ध झालेली नसली, तरी लक्ष्मण शिवरामकृष्णन यांनी ‘एक्स’ (पूर्वीचे ट्विटर) वर पोस्ट करत आपला संताप व्यक्त केला आहे.

Vape is banned in India. Should be behind bars. What is the point in having Laws and not implementing them. 25% of match fees is peanuts. What if a regular person had done this, What would the action be?

— Laxman Sivaramakrishnan (@LaxmanSivarama1) May 8, 2026

लक्ष्मण शिवरामकृष्णन यांनी लिहिले की, “जर देशात व्हेपिंगवर बंदी आहे, तर या लोकांनी असे केले असेल तर त्यांना थेट तुरुंगात पाठवायला हवे. जर कायद्याची अंमलबजावणीच होणार नसेल तर तो बनवण्याचा उपयोग काय? या प्रकरणात केवळ २५ टक्के दंड आकारणे ही खूप लहान शिक्षा आहे. जर हीच गोष्ट एखाद्या सामान्य माणसाने केली असती, तर त्याच्यावर काय कारवाई झाली असती?”

बीसीसीआयची ८ पानांची नवी गाईडलाईन –

खेळाडूंकडून वारंवार होणारे प्रोटोकॉलचे उल्लंघन पाहून बीसीसीआयने सर्व १० फ्रँचायझींना ८ पानांची एक नवी मार्गदर्शक नियमावली जारी केली आहे. यामध्ये ई-सिगारेट आणि इतर सर्व प्रतिबंधित पदार्थांबाबत कठोर नियम स्पष्ट करण्यात आले आहेत. बोर्डाच्या मते, टीम ड्रेसिंग रूम, प्रॅक्टिस एरिया आणि टीम हॉटेलमध्ये या गोष्टींवर पूर्णपणे बंदी असेल. या नियमांचे उल्लंघन करणाऱ्या खेळाडूवर कठोर कारवाई करण्याचा इशारा देण्यात आला आहे.

हेही वाचा – Cricket Board Robbery : क्रिकेट विश्वात खळबळ! भर दिवसा क्रिकेट बोर्डावरच सशस्त्र दरोडा; बंदुकीच्या धाकावर लुटले १५,००० डॉलर्स

रियान परागच्या प्रकरणात बीसीसीआयने यापूर्वीच कारवाई केली आहे, मात्र चहलच्या प्रकरणावर अद्याप कोणतेही अधिकृत विधान समोर आलेले नाही. मात्र, शिवरामकृष्णन यांच्या विधानामुळे हा वाद आता अधिकच पेटण्याची शक्यता आहे.