IPL 2024 (KKR vs MI Match 60 : Today 7.30 PM) – आयपीएल 2024 चा 60 वा सामना आज (शनिवार,11 मे) कोलकाता नाईट रायडर्स आणि मुंबई इंडियन्स यांच्यात ईडन गार्डन्सवर संध्याकाळी 7.30 वाजता खेळला जाईल.  आयपीएल 2024 चा लीग टप्पा आता शेवटच्या टप्प्यात आहे. कोलकाता नाईट रायडर्स प्लेऑफच्या उंबरठ्यावर आहे. एक विजय आणि केकेआर प्लेऑफचे तिकीट बुक करेल. शनिवारी कोलकाता नाईट रायडर्सचा सामना मुंबई इंडियन्सशी त्यांच्या घरच्या ईडन गार्डन्सवर होणार आहे.

मुंबई आधीच प्लेऑफच्या शर्यतीतून बाहेर आहे आणि केकेआरच्या या विजयामुळे टॉप-4 चे तिकीट निश्चित होईल. अशा परिस्थितीत केकेआरला शनिवारीच हा सामना जिंकून प्लेऑफमध्ये पोहोचणारा पहिला संघ बनण्याची संधी असेल.

दोन्ही संघांमधील हा या मोसमातील दुसरा सामना असेल. यापूर्वी 3 मे रोजी वानखेडे स्टेडियमवर झालेल्या सामन्यात कोलकाता नाईट रायडर्सने मुंबई इंडियन्सचा 24 धावांनी पराभव केला होता. अशा स्थितीत यावेळी पुन्हा केकेआरचा वरचष्मा आहे. मुंबई इंडियन्सकडे गमावण्यासारखे काही नाही. ते प्रतिष्ठा वाचवण्यासाठी मैदानात उतरतील. केकेआरला 3 वर्षांत प्रथमच प्लेऑफमध्ये   प्रवेश करण्याची संधी आहे आणि त्यांना घरच्या मैदानावर ती गमावणे आवडणार नाही.

मुंबई इंडियन्स आणि कोलकाता नाईट रायडर्स यांच्यात आयपीएलमध्ये आतापर्यंत 33 सामने खेळले गेले आहेत. यापैकी मुंबईने 23 तर केकेआरने 10 जिंकले. म्हणजेच आकडेवारीच्या बाबतीत मुंबईचा वरचष्मा आहे. पण, या मोसमात केकेआरला रोखणे मुंबईसाठी सोपे जाणार नाही.

IPL 2024 : RCB पासून RR पर्यंत..! जाणून घ्या, सर्व 10 संघांचे कोण आहेत मालक आणि कर्णधाराला किती मिळतो पगार?

आता IPL 2024 मधील मुंबई इंडियन्सचा प्रवास संपला आहे. पण, पुढे टी-20 विश्वचषक आहे. अशा परिस्थितीत मुंबई इंडियन्सच्या चांगल्या कामगिरीऐवजी चाहत्यांच्या नजरा त्या खेळाडूंवर असतील जे मुंबई इंडियन्सनंतर टी-20 वर्ल्ड कपमध्ये भारताकडून खेळताना दिसणार आहेत. यामध्ये सूर्यकुमार यादव, रोहित शर्मा, जसप्रीत बुमराह आणि हार्दिक पांड्या यांचा समावेश आहे. सूर्यकुमारचा अलीकडचा फॉर्म उत्कृष्ट आहे. त्याने अलीकडेच 56 आणि 102 धावांची नाबाद खेळी खेळली आहे. त्याचवेळी हार्दिक गोलंदाजीत चांगली कामगिरी करत आहे. पण, त्याला फलंदाजीतही स्वत:ला सिध्द करावं लागेल.