मुंबई : शिवसेना शिंदे गटाचे खासदार नरेश म्हस्के यांनी ठाकरे गटाचे खासदार संजय राऊत आणि अरविंद सावंत यांच्यावर ‘ऑपरेशन सिंदूर’वर व भारतीय लष्कराच्या पराक्रमाबाबत गैरसमज पसरवल्याचा गंभीर आरोप करत त्याची चौकशी करून त्यांच्यावर देशद्रोहाचा गुन्हा दाखल करावा, अशी मागणी केली आहे.

भारतीय लष्कराच्या कारवाईवर संशय घेणारे संजय राऊत आणि अरविंद सावंत या दोन्ही खासदारांच्या तोंडून पाकिस्तानची भाषा बाहेर पडत असून, ते पाकिस्तानी लष्कराचे प्रवक्ते बनले आहेत, अशी टीका देखील नरेश म्हस्के यांनी केली आहे.

नेमकं काय म्हणाले नरेश म्हस्के?

खासदार नरेश म्हस्के म्हणाले की, गेले दोन दिवस भारतीय लष्कराच्या कारवाईवर संजय राऊत आणि अरविंद सावंत संशयास्पद परिस्थिती निर्माण करत आहेत. पाकिस्तानी लष्कर, पाकिस्तानी राज्यकर्त्यांची भाषा राऊत आणि सावंत यांच्या तोंडून बाहेर पडत आहे. ‘गिरे तो भी टांग उपर’, हे कोणाला उद्देशून आहे, असा सवाल नरेश म्हस्के यांनी अरविंद सावंत यांना केला.

तसेच भारताच्या हवाई दलाचे वैमानिक दक्ष असून आदेशाची वाट पाहत आहेत. ‘गिरे तो भी टांग उपर’ म्हणणे हा या वैमानिकांचा अपमान नाही का? अरविंद सावंत यांनी या वक्तव्यावर ताबडतोब स्पष्टीकरण द्यावे, असा इशारा देखील म्हस्के यांनी यावेळी दिला.

भारतीय लष्कर हे हिंदुस्थानचे लष्कर आहे. त्यांच्यावर विश्वास ठेवायचा सोडून पाकिस्तानची भाषा काय बोलताय, अशा शब्दांत म्हस्के यांनी ठाकरे गटाच्या खासदारांवर बोचरी टीका केली. भारतीय लष्कराबाबत राऊत आणि सावंत यांनी केलेली वक्तव्यांचा प्रत्येक नागरिकाने तीव्र निषेध करायला हवा, असे नरेश म्हस्के यांनी म्हटले आहे.