Balochistan Attack – पाकिस्तानातील बलुचिस्तान प्रांतात वेगवेगळ्या घटनांमध्ये सुरक्षा दलांनी १५ दहशतवाद्यांना ठार केले आहे, असे सरकारी माध्यमांनी रविवारी सांगितले. मस्तंग बोलान, वाशुक अवारान, सिबी, खुझदार, हमाय आणि नुश्‍की भागांमध्ये

आठवडाभर ऑपरेशन राद्दुल फित्ना ३ राबवण्यात आले होते. त्यावेळी या दहशतवाद्यांचा खात्मा केला गेला. सुरक्षा दलांनी या कारवाईदरम्यान ठार झालेल्या दहशतवाद्यांकडून मोठ्या प्रमाणात शस्त्रे आणि दारूगोळाही जप्त केला.

या कारवाईमुळे दहशतवाद्यांचे नेटवर्क मोठ्या प्रमाणावर उद्ध्वस्त करण्यात आले, असे पाक सरकारी वृत्तवाहिनीने म्हटले आहे. दिनांक ६ जुलै रोजी बलुचिस्तानच्या झियारात भागात दहशतवाद्यांनी केलेल्या हल्ल्यात २७ पोलीस ठार झाले होते.

त्यानंतर गेल्या महिन्याभरापासून बलुचिस्तानच्या विविध भागांमध्ये दहशतवाद्यांचा शोध घेण्याचे काम सुरू होते. बलुचिस्तानमधील कारवाईत ठार झालेल्या दहशतवाद्यांचा एकूण आकडा २४१ टक्क्यांनी वाढला आहे. जूनमध्ये १०९ दहशतवादी ठार झाले होते.

तो वाढून जुलैमध्ये ३७२ झाला असल्याचे पाकिस्तान इन्स्टिट्युट फॉर कॉन्फ्लिक्ट ऍन्ड सिक्युरीटी स्टडीजने म्हटले आहे. जूनमध्ये ठार झालेल्या सहा कर्मचाऱ्यांच्या तुलनेत जुलैमध्ये बलुचिस्तानमधील विविध घटना आणि कारवायांमध्ये ६२ सुरक्षा कर्मचारी ठार झाले, असेही त्यात म्हटले आहे.