International Yoga Day – आंतरराष्ट्रीय योग दिनी आयुष मंत्रालयाने यंदा गिनीज वर्ल्ड रेकॉर्ड प्रस्थापित करणार आहे. १४ जून रोजी सकाळी ६.१५ ते ७.३५ या वेळेत एका विशेष ऑनलाईन योग सत्राचे आयोजन केले असून, याद्वारे एकाच वेळी सर्वाधिक लोकांनी ऑनलाईन सहभागी होण्याचा जागतिक विक्रम रचण्याचे उद्दिष्ट आहे. या उपक्रमात देशातील सर्व महाविद्यालये, विद्यापीठे आणि शैक्षणिक संस्थांमधील शिक्षक, विद्यार्थी व कर्मचाऱ्यांनी मोठ्या संख्येने सहभागी व्हावे,

अशा सूचना विद्यापीठ अनुदान आयोगाने (यूजीसी) दिल्या आहेत. २१ जून रोजी साजरा होणाऱ्या आंतरराष्ट्रीय योग दिनाचाच एक भाग म्हणून आयुष मंत्रालयाच्या अधिकृत यूट्यूब प्लॅटफॉर्मवर हे सत्र थेट प्रक्षेपित केले जाईल. गिनीज वर्ल्ड रेकॉर्डमध्ये या विक्रमाची नोंद होण्यासाठी नागरिकांचा सहभाग महत्त्वाचा आहे.

इच्छुकांनी १८००-३१५-७००८ या टोल-फ्री क्रमांकावर मिस्ड कॉल देऊन नोंदणी करावी. त्यानंतर व्हॉट्सॲपवर ऑनलाईन सत्राची लिंक येईल. यूजीसीचे सचिव प्रा. श्यामा रथ यांनी सर्व शिक्षण संस्थांना यात पुढाकार घेण्याचे आवाहन केले आहे.