प्रभात वृत्तसेवा पुणे – राष्ट्रीय पुस्तक न्यासाने (एनबीटी) आयोजित केलेल्या पुणे पुस्तक महोत्सवाची सुरुवात शुक्रवारी विश्वविक्रमाच्या नोंदीने झाली. लार्जेस्ट डिस्प्ले ऑफ पोस्टर्स हा विश्वविक्रम गिनीज वर्ल्ड रेकॉर्ड्समध्ये प्रस्थापित केला. तसेच पुणेकरांनी भारतातील बोलीभाषा आणि आदिवासी शब्दांना मुख्य प्रवाहात आणण्याचा प्रयत्न केला आहे.हा विश्वविक्रम भगवान बिरसा मुंडा यांच्या कार्याला आदरांजली असल्याचे मत तज्ज्ञांनी यावेळी व्यक्त केले. १६७८ पोस्टर्सचा नवा विक्रम पुणे पुस्तक महोत्सव, यशवंतराव चव्हाण महाराष्ट्र मुक्त विद्यापीठ आणि राईज फाउंडेशनतर्फे हा विक्रम नोंदवण्यात आला. गिनीज वर्ल्ड रेकॉर्ड्सचे स्वप्नील डांगरीकर यांच्या माहितीनुसार लार्जेस्ट डिस्प्ले ऑफ पोस्टर्सचा यापूर्वीचा विश्वविक्रम अमेरिकेच्या नावावर होता. अमेरिकेने फेब्रुवारी २०२५ मध्ये १३६५ पोस्टर्सच्या साहाय्याने हा विक्रम केला होता. पुणे पुस्तक महोत्सवात १६७८ पोस्टर्स प्रदर्शित करून हा विक्रम मोडीत काढला. बिरसा मुंडा यांचा सन्मान महोत्सवात भगवान बिरसा मुंडा यांचे विशेष दालन असून त्यांच्या कार्याला अभिवादन करण्यासाठी लाखो आदिवासी शब्दांच्या साहाय्याने हे १६७८ पोस्टर्स प्रदर्शित केले. यावेळी ज्येष्ठ सामाजिक कार्यकर्ते गिरीश प्रभुणे, राष्ट्रीय पुस्तक न्यासाचे अध्यक्ष प्रा. मिलिंद मराठे, मुक्त विद्यापीठाचे कुलगुरू डॉ. संजीव सोनवणे, पुणे पुस्तक महोत्सवाचे मुख्य संयोजक राजेश पांडे, ऋषिकेश खिलारे, अर्चना खिलारे, प्रसेनजीत फडणवीस आदी उपस्थित होते.गिरीश प्रभुणे म्हणाले, बिरसा मुंडा यांनी १०-१५ वर्षांच्या काळात धर्मांतराविरोधात आदिवासींमध्ये चेतना निर्माण केली. स्वातंत्र्याच्या हक्कासाठी उभे राहणारे ते पहिले होते.
