India Women Crush Zimbabwe by 9 Wickets to Seal T20I Series in Raipur : भारत आणि झिम्बाब्वे महिला संघांमधील टी-२० मालिकेतील दुसऱ्या सामन्यात भारताने एकतर्फी वर्चस्व गाजवत ९ गडी राखून शानदार विजय मिळवला. रायपूरच्या मैदानावर पार पडलेल्या या सामन्यात प्रथम फलंदाजी करणाऱ्या झिम्बाब्वेचा डाव अवघ्या १०२ धावांवर आटोपला. विजयासाठी मिळालेले १०३ धावांचे सोपे आव्हान भारतीय महिला संघाने स्मृती मानधना आणि शफाली वर्मा यांच्या वादळी सुरुवातीच्या जोरावर अवघ्या काही षटकांत सहज पार केले. या विजयासह भारताने तीन सामन्यांच्या मालिकेत २-० अशी विजयी आघाडी घेत मालिका खिशात घातली आहे.

पहिल्याच चेंडूपासून हल्लाबोल; सलामी जोडीची ९६ धावांची भागीदारी

पहिल्या सामन्यात छोट्या आव्हानाचा पाठलाग करताना भारताचे अवघ्या १९ धावांवर ४ फलंदाज बाद झाले होते. मात्र, या सामन्यात सलामी जोडीने कोणताही धोका पत्करला नाही. कर्णधार स्मृती मानधना आणि शफाली वर्माने मैदानात उतरताच पहिल्या चेंडूपासून चौफेर फटकेबाजी सुरू केली. दोघींनी अवघ्या पाचव्या षटकात संघाची धावसंख्या ६० पार पोहोचवली. या सलामी जोडीने पहिल्या विकेटसाठी ९६ धावांची भक्कम भागीदारी रचून विजयाचा पाया रचला. शफाली वर्माने आक्रमक अर्धशतक ठोकले, तर कर्णधार स्मृती मानधनाने ४७ धावांची दमदार खेळी केली.

झिम्बाब्वेची संथ फलंदाजी; पॉवरप्लेमध्ये अवघा एक चौकार –

Skipper Smriti Mandhana finishes it off in style 👏

#TeamIndia with a clinical 9️⃣-wicket win to clinch the series 2-0 🇮🇳

Scorecard ▶️ https://t.co/kECmCQJzty

#INDvZIM | @mflone_ https://t.co/O7MAN9o4J3

— BCCI Women (@BCCIWomen) October 18, 2026

तत्पूर्वी झिम्बाब्वेने नाणेफेक जिंकून प्रथम फलंदाजी करण्याचा निर्णय घेतला, मात्र भारतीय गोलंदाजांच्या शिस्तबद्ध माऱ्यापुढे त्यांचे फलंदाज निष्प्रभ ठरले. संपूर्ण पॉवरप्लेमध्ये झिम्बाब्वेला केवळ एक चौकार मारता आला. सलामीवीर केलिज न्दलोवू शून्यावर, तर बिझा अवघ्या ७ धावांवर बाद झाली. चिपो तिरिपानोने ३४ आणि कर्णधार क्नोमोने २२ धावा केल्या तरी इतर फलंदाज अपयशी ठरल्याने त्यांना २० षटकांत १०२ धावांपर्यंतच मजल मारता आली. भारताकडून निकी प्रसादने अवघ्या ७ धावा देऊन २ गडी बाद केले, तर क्रांती गौड, नंदीनी शर्मा, अरुंधती रेड्डी आणि श्री चरणी यांनी प्रत्येकी एक विकेट्स मिळवली.

हेही वाचा – Priyansh Arya Century : अवघ्या एका धावेने हुकले द्विशतक! रणजी सामन्यात प्रियांश आर्याचे तुफान; गुजरातच्या गोलंदाजांना फोडला घाम

भारताची मालिकेत २-० अशी अभेद्य आघाडी; तिसरा सामना मंगळवारी

पहिल्या टी-२० सामन्यात ४ गडी राखून मात केल्यानंतर या दुसऱ्या लढतीत ९ गडी राखून दणदणीत विजय मिळवत भारतीय महिला संघाने मालिकेवर नाव कोरले आहे. आता या ऐतिहासिक मालिकेतील तिसरा आणि अंतिम सामना मंगळवारी, २० ऑक्टोबर रोजी रायपूरच्याच मैदानावर सायंकाळी ७ वाजता खेळवला जाणार असून, भारतीय संघ ३-० अशा व्हाईटवॉशच्या निर्धाराने मैदानात उतरेल.