Donald Trump | Narendra modi  – अमेरिकेचे अध्यक्ष डोनाल्ड ट्रम्प यांनी सोमवारी भारत आणि नाव न घेता पंतप्रधान नरेंद्र मोदी यांचेही कौतुक केले. इजिप्तमध्ये आयोजित आंतरराष्ट्रीय परिषदेमध्ये ते बोलत होते. गाझामध्ये इस्रायल आणि हमादरम्यान युद्धबंदी लागू झाल्यानंतर गाझाच्या फेरउभारणीसंबंधी विचार करण्यासाठी या परिषदेचे आयोजन करण्यात आले होते.

भारत एक महान देश आहे आणि माझे परम मित्र त्या देशाच्या सर्वोच्चपदी आहेत. त्यांनी खरोखरच खूपच चांगले काम केले आहे. असे ट्रम्प म्हणाले. पाकिस्तान आणि भारत खरोखरच खूप चांगल्या प्रकारे एकत्र राहू शकतील, असेही ट्रम्प म्हणाले.

याप्रसंगी पाकिस्तानचे पंतप्रधान शेहबाज शरीफ ट्रम्प यांच्या मागेच उभे होते. त्यांच्याकडे बघतच ट्रम्प यांनी भारताचे कौतुक केले होते. शरीफ यांनी मात्र या वक्तव्यावर स्मितहास्य करत प्रतिक्रिया दिली. ट्रम्प यांनी शरीफ आणि पाकिस्तानचे फिल्ड मार्शल जनरल आसिम मुनीर यांचेही ट्रम्प यांनी कौतुक केले आणि गाझाबाबतच्या परिषदेला संबोधित करण्यासाठी शरीफ यांना त्यांनी निमंत्रण दिले.

ट्रम्प यांच्या अथक प्रयत्नांमुळे मध्यपूर्वेमध्ये आता शांतता झाली आहे, असे शरीफ म्हणाले. भारत आणि पाकिस्तानमधील संघर्ष थांबवण्यासाठी केलेल्या अद्वितीय आणि असाधारण प्रयत्न केल्याबद्दल पाकिस्तानने शांततेच्या नोबेल पुरस्कारासाठी ट्रम्प यांचे नामांकन केले आहे.

आता केवळ दक्षिण आशियातीलच नव्हे तर मध्यपूर्वेतील लक्षावधी लोकांचे प्राण वाचवल्याबद्दल पुन्हा एकदा ट्रम्प यांचे शांततेच्या नोबेल पुरस्कारासाठी नामांकन आपण करणार असल्याचेही शरीफ यांनी सांगितले.