Indapur News- राज्य शासनाने दुष्काळ जाहीर केल्यानंतर बाधित पिकांचे सरसकट पंचनामे करण्याचे स्पष्ट आदेश दिलेले आहेत. सर्व शेतकऱ्यांना दुष्काळ नुकसान भरपाई मिळावी, ही शासनाची भूमिका असताना इंदापूर तालुक्यात मात्र प्रशासकीय पातळीवर अत्यंत संथ गतीने काम सुरू असून, कामचुकारपणा आणि भ्रष्टाचाराचे प्रकार घडत असल्याची तीव्र भावना बळीराजाकडून व्यक्त होत आहे. अगोदरच निसर्गाच्या कोपामुळे शेतकरी दुहेरी संकटात सापडला आहे.

आम्ही शेतकऱ्यांचीच मुले आहोत असे सांगणाऱ्या अधिकाऱ्यांना खुर्चीवर बसल्यानंतर आपल्या बापाच्या कष्टाचा विसर पडला आहे का? असा संतप्त सवाल उपस्थित होत आहे. यासंदर्भात भारतीय जनता पार्टीचे जिल्हा महामंत्री डॉ. आकाश कांबळे यांनी प्रशासकीय कारभारावर जोरदार हल्लाबोल केला. एकीकडे शासन जास्तीत जास्त मदत देण्यासाठी सकारात्मक असताना,

पुणे जिल्ह्यात आणि विशेषतः इंदापूर तालुक्यात पंचनामे अत्यंत संथ गतीने सुरू आहेत. काही ठिकाणी पंचनामे करणाऱ्या अधिकाऱ्यांकडून हताश शेतकऱ्यांकडे पैशांची मागणी केली जात असल्याच्या गंभीर तक्रारी येत आहेत. संकटात सापडलेल्या शेतकऱ्यांच्या टाळूवरील लोणी खाणाऱ्या अशा भ्रष्ट अधिकाऱ्यांवर भारतीय जनता पार्टीकडून कठोर चाप लावला जाईल, असा सडेतोड इशारा डॉ. कांबळे यांनी दिला आहे.

कृषिमंत्र्यांच्याच तालुक्यात शेतकऱ्यांवर अन्याय?
महाराष्ट्र राज्याचे कृषिमंत्री प्रतिनिधित्व करत असलेल्या इंदापूर तालुक्यातच जर प्रशासकीय नाकर्तेपणामुळे शेतकऱ्यांना न्यायापासून वंचित राहावे लागत असेल, तर सामान्य शेतकऱ्यांनी न्यायाची अपेक्षा नेमकी कुणाकडे करायची? असा सवाल आता तालुकाभरातून उपस्थित केला जात आहे.