Indapur : इंदापूर तालुक्याच्या बऱ्याच भागात अतिवृष्टी झाल्यामुळे शेतकऱ्यांचे अतोनात नुकसान झाले आहे. गोरगरिबांच्या घराचे नुकसान झाले आहे. अशा नुकसानग्रस्त कुटुंबांना शेतकऱ्यांना शासनाची मदत मिळण्यासाठी मी स्वतः लक्ष घालणार आहे. यासाठी पाठपुरावा देखील करणार आहे. अशी माहिती बारामती लोकसभा मतदारसंघाच्या खासदार सुप्रिया सुळे यांनी दिली. खासदार सुप्रिया सुळे यांनी कळंब, कुरवली, सणसर, शेटफळगडे (ता. इंदापूर) येथील अतिवृष्टीमुळे झालेल्या नुकसानीची पाहणी केली. यावेळी सुप्रिया सुळे यांनी नागरिकांशी संवाद साधून त्यांच्या मागण्या जाणून घेतल्या. यावेळी राष्ट्रवादी काँग्रेस पार्टी शरदचंद्र पवार पक्षाचे इंदापूर तालुकाध्यक्ष तेजसिंह पाटील, कार्याध्यक्ष महारुद्र पाटील, पुणे जिल्हा सामाजिक न्याय विभाग अध्यक्ष सागर मिसाळ, अनिकेत निंबाळकर, ग्रामस्थ यांच्यासह पक्षाचे पदाधिकारी व कार्यकर्ते आदी उपस्थित होते. नुकसान ग्रस्त शेतकऱ्यांना सुप्रिया सुळे यांच्यासमोर अश्रू आवरता आले नाहीत, त्यांनी नुकसानग्रस्त शेतकऱ्यांना आधार देत तुमच्या पाठीशी खासदार म्हणून मी कायम आहे. चिंता करू नका असाही शब्द पाहणी दौऱ्यात दिला.
