IND vs WI 2nd T20 Abhishek Sharma World Record Most Sixes In First Over : भारतीय संघाचा स्फोटक युवा सलामीवीर अभिषेक शर्मा (Abhishek Sharma) आणि डावाच्या पहिल्याच षटकात षटकार हे आता क्रिकेटमधील एक अतूट समीकरण बनलं आहे. वेस्ट इंडिजविरुद्ध रांची येथे खेळल्या गेलेल्या दुसऱ्या टी-२० सामन्यात अभिषेकने मैदानात उतरताच पुन्हा एकदा वादळ निर्माण केले. विंडीजचा फिरकीपटू अकील हुसेनविरुद्ध पहिल्या षटकाच्या अखेरच्या चेंडूवर इनसाइड-आउट षटकार खेचत अभिषेकने टी-२० आंतरराष्ट्रीय क्रिकेटमध्ये जागतिक विक्रमाला गवसणी घातली आहे.

पहिल्याच षटकात १४ वा षटकार; स्टर्लिंग अन् लुईसला टाकले मागे!

अभिषेक शर्माने डावाच्या पहिल्या षटकात मारलेला हा आंतरराष्ट्रीय टी-२० कारकिर्दीतील तब्बल १४ वा षटकार ठरला. या गगनचुंबी षटकारासह तो टी-२० आंतरराष्ट्रीय क्रिकेटच्या डावातील पहिल्या षटकात सर्वाधिक षटकार मारणारा जगातील अव्वल फलंदाज बनला आहे. आपल्या ६३ व्या आंतरराष्ट्रीय सामन्यात त्याने आयर्लंडचा पॉल स्टर्लिंग आणि वेस्ट इंडिजचा आक्रमक सलामीवीर एव्हिन लुईस (प्रत्येकी १३ षटकार) यांना मागे टाकून इतिहास रचला.

डावाच्या पहिल्या षटकात सर्वाधिक षटकार मारणारे फलंदाज:

• अभिषेक शर्मा: १४ षटकार
• पॉल स्टर्लिंग: १३ षटकार
• एव्हिन लुईस: १३ षटकार
• रोहित शर्मा: १२ षटकार
• मार्टिन गप्टिल: १२ षटकार

भारतीय मैदानांवर पूर्ण केल्या १,००० आंतरराष्ट्रीय धावा!

रांचीमध्ये अभिषेकची वादळी खेळी अवघ्या १२ चेंडूंत संपली असली, तरी या खेळीदरम्यान त्याने आणखी एक मैलाचा दगड पार केला. १ षटकार आणि २ चौकारांसह २० धावांची खेळी करताना त्याने भारतातील मैदानांवर आंतरराष्ट्रीय टी-२० क्रिकेटमध्ये १ हजार धावांचा टप्पा यशस्वीरीत्या गाठला.

हेही वाचा – Sanju Samson Record : संजू सॅमसनचा रांचीत कहर! २१ चेंडूंत अर्धशतक ठोकत कोहलीच्या विक्रमाशी बरोबरी; चौथ्या शतकाची हुकली संधी

मोठ्या फटक्याच्या नादात आऊट; तरीही नावावर ऐतिहासिक नोंद!

संजू सॅमसन सुरुवातीला सावध फलंदाजी करत असताना अभिषेकने पहिल्या चेंडूपासूनच आक्रमण सुरू ठेवले होते. मात्र, रोस्टन चेसच्या गोलंदाजीवर मोठा फटका मारण्याच्या नादात चेंडू बॅटवर नीट न आल्याने तो झेलबाद झाला. स्वस्तात बाद झाला असला, तरी पहिल्या षटकातील त्या एकाच षटकाराने त्याने क्रिकेटच्या इतिहासात आपले नाव सुवर्णअक्षरांनी कोरले.