IND vs SL Test : टीम इंडियाचा आगामी कसोटी दौरा जाहीर! १५ ऑगस्टपासून श्रीलंकेशी करणार दोन हात; ‘हा’ स्टार सांभाळणार धुरा
IND vs SL Test : टीम इंडिया पुढील महिन्यात म्हणजेच ऑगस्ट २०२६ मध्ये टीम इंडिया श्रीलंकेच्या दौऱ्यावर जाणार आहे.
IND vs SL Test Series August 2026 Schedule Venues Shubman Gill WTC : भारतीय क्रिकेट संघाचे आगामी वेळापत्रक अत्यंत व्यस्त असून पुढील महिन्यात म्हणजेच ऑगस्ट २०२६ मध्ये टीम इंडिया श्रीलंकेच्या दौऱ्यावर जाणार आहे. या दौऱ्यात उभय संघांमध्ये दोन सामन्यांची कसोटी मालिका खेळवली जाईल. विशेष म्हणजे, ही मालिका आयसीसी विश्व कसोटी अजिंक्यपद स्पर्धेचा (WTC) भाग असल्याने टीम इंडियासाठी अत्यंत महत्त्वपूर्ण आहे. श्रीलंका क्रिकेट बोर्ड आणि बीसीसीआयने या कसोटी मालिकेचे संपूर्ण वेळापत्रक जाहीर केले आहे. या मालिकेत पुन्हा एकदा टीम इंडियाची धुरा शुबमन गिलच्या खांद्यावर असेल.
१५ ऑगस्टपासून गॉले आणि कोलंबोमध्ये रंगणार रणसंग्राम
सध्या भारतीय संघ जागतिक कसोटी अजिंक्यपद स्पर्धेच्या गुणतालिकेत काहीसा पिछाडीवर आहे. त्यामुळे अंतिम फेरीत पोहोचण्याच्या आशा जिवंत ठेवण्यासाठी भारताला श्रीलंकेला त्यांच्याच मायदेशात पराभूत करावे लागेल. मालिकेतील पहिला कसोटी सामना १५ ऑगस्ट ते १९ ऑगस्ट दरम्यान गॉलेयेथील ऐतिहासिक मैदानावर खेळवला जाईल. तर, दुसरा आणि अंतिम कसोटी सामना २३ ऑगस्ट ते २७ ऑगस्ट दरम्यान कोलंबोमध्ये रंगणार आहे.
कसोटीपूर्वी इंग्लंड आणि झिम्बाब्वेचे मोठे आव्हान –
Mark your calendars 🗓️
Presenting #TeamIndia‘s schedule for the two-match Test series against Sri Lanka, starting August 15 🙌#SLvIND pic.twitter.com/FoUEaUb3Qe
— BCCI (@BCCI) July 2, 2026
श्रीलंका दौऱ्यावर जाण्यापूर्वी भारतीय संघाला इतर देशांविरुद्ध खेळायचे आहे. सध्या टीम इंडिया इंग्लंड दौऱ्यावर असून तिथे ११ जुलैपर्यंत ५ सामन्यांची टी-२० मालिका खेळवली जात आहे. त्यानंतर १९ जुलैपर्यंत ३ वनडे सामन्यांची मालिका होईल. इंग्लंड दौरा संपल्यानंतर भारतीय संघ झिम्बाब्वेच्या दौऱ्यावर रवाना होईल. तिथे ३ टी-२० सामन्यांची मालिका खेळवली जाणार आहे. २०२७ चा एकदिवसीय विश्वचषक दक्षिण आफ्रिका, झिम्बाब्वे आणि नामीबिया येथे होणार असल्याने ही मालिका आगामी विश्वचषकाच्या तयारीच्या दृष्टीने अत्यंत महत्त्वाची मानली जात आहे.
सध्याच्या घडीला भारताची कामगिरी तिन्ही फॉर्मेटमध्ये काहीशी चढ-उतारांची राहिली आहे. मात्र, या व्यस्त वेळापत्रकात शुबमन गिलच्या नेतृत्वाखाली भारतीय संघ श्रीलंकेत कशी कामगिरी करतो, याकडे सर्वांचे लक्ष लागून राहिले आहे.
