Ravindra Jadeja created history : मुंबईत खेळल्या गेलेल्या न्यूझीलंडविरुद्धच्या तिसऱ्या कसोटीत रवींद्र जडेजाने इतिहास रचला. या कसोटीत जडेजाने दोन्ही डावांत 5-5 विकेट घेतल्या. जड्डूने कारकिर्दीत प्रथमच कसोटीच्या दोन्ही डावात अशी कामगिरी केली आहे. यासह कसोटीच्या दोन्ही डावात 5-5 बळी घेणारा जडेजा हा दुसरा भारतीय गोलंदाज ठरला.

मुंबईत न्यूझीलंडविरुद्धच्या पहिल्या डावात जडेजाने 65 धावा देत 5 विकेट घेतल्या आणि दुसऱ्या डावात भारतीय फिरकी गोलंदाजाने 55 धावा खर्च करत पुन्हा एकदा 5 बळी घेतले. अशाप्रकारे जडेजाने तिस-या सामन्यात 120 धावा देताना एकूण 10 बळी घेतले, जी त्याच्या कसोटी कारकिर्दीतील बेस्ट बॉलिंग फिगर ठरली. जड्डूने 2023 मध्ये गोलंदाजीत ऑस्ट्रेलियाविरुद्ध 110 धावा देत 10 बळी घेताना त्याच्या कारकिर्दीतील सर्वोत्तम कामगिरीची नोंद केली होती.

जडेजाच्या आधी रविचंद्रन अश्विन हा एकमेव गोलंदाज होता ज्याने कसोटीच्या दोन्ही डावात 5-5 बळी घेतले होते. अश्विनने हा पराक्रम दोनदा केला आहे. सर्वप्रथम अश्विनने 2013 मध्ये ऑस्ट्रेलियाविरुद्ध चेन्नई कसोटीच्या दोन्ही डावात 5-5 विकेट घेतल्या होत्या.त्यानंतर नागपुरात दक्षिण आफ्रिकेविरुद्ध खेळल्या गेलेल्या कसोटीत अश्विनने दोन्ही डावांत 5-5 बळी घेतले होते.

IND vs NZ 3rd Test : न्यूझीलंडचा 3-0 ने ऐतिहासिक मालिका विजय, मुंबई कसोटीतही भारताला चारली पराभवाची धूळ…

तसेच जडेजानं कसोटी कारकिर्दीत 10 विकेट घेण्याच्या कामगिरीची तिस-यांदा नोंद केली. भारताकडून सर्वाधिक 10 विकेट्स घेण्याच्या यादीत माजी दिग्गज फिरकी गोलंदाज अनिल कुंबळे आणि सध्याचा फिरकी गोलंदाज आर अश्विन संयुक्तपणे अव्वल स्थानावर आहेत.

भारतासाठी सर्वाधिक वेळा 10 विकेट हॉल घेणारे गोलंदाज खालीलप्रमाणे…

1) अनिल कुंबले- 8
2) रविचंद्र अश्विन- 8*
3) हरभजन सिंह- 5
4) रवींद्र जडेजा- 3*
5) कपिल देव- 2
6) इरफान पठान- 2.