Ben Stokes Play IND vs ENG 5th Test or not : भारत आणि इंग्लंड यांच्यातील पाच कसोटी सामन्यांच्या मालिकेत उत्कंठा कायम आहे. भारताने मँचेस्टर येथे झालेला चौथा कसोटी सामना जबरदस्त पुनरागमन करत अनिर्णीत राखला. ज्यामुळे इंग्लंडच्या अजिंक्य आघाडीच्या आशा धुळीस मिळाल्या. भारत सध्या १-२ ने पिछाडीवर आहे. आता ३१ जुलैपासून सुरू होणारा पाचवा कसोटी सामना जिंकून मालिका बरोबरीत राखण्याची संधी भारतीय संघाकडे आहे. या सामन्यात कर्णधार बेन स्टोक्स खेळणार की नाही? हे त्याने स्वत:च स्पष्ट केले.

मी खेळणार नाही याची शक्यता जवळपास शून्य – बेन स्टोक्स

इंग्लंडचा कर्णधार आणि स्टार अष्टपैलू बेन स्टोक्स पाचव्या सामन्यात खेळणार नसल्याच्या चर्चा होत्या, परंतु त्याने स्पष्ट केले की, अंतिम सामन्यातून बाहेर बसण्याचा त्याचा कोणताही विचार नाही. स्टोक्सने रविवारी दुखापतीनंतरही ११ षटके गोलंदाजी केली. दुखापत ही केवळ एक भावना आहे, असे सांगत त्याने पाचव्या कसोटीत खेळण्याचे संकेत दिले. तो म्हणाला, “मी खेळणार नाही याची शक्यता जवळपास शून्य आहे. मी नेहमी माझे सर्वस्व देण्याचा प्रयत्न करतो.”

दुखापत ही फक्त एक भावना –

बेन स्टोक्स पुढे म्हणाला, “माझी दुखापत आणखी बळावलेली नाही. त्यामुळे लवकरच बरे होऊन मी अंतिम कसोटी खेळेन अशी आशा आहे. मी एक अष्टपैलू खेळाडू म्हणून माझे काम केले आहे. विशेष म्हणजे या आठवड्यात थोडे जास्त केले. गोलंदाजी करणे सोपे नाही. सध्या दुखापत आहे, पण मी प्रयत्न करत राहीन. मी सर्व गोलंदाजांना सांगतो की दुखापत ही फक्त एक भावना आहे.”

हेही वाचा – IND vs ENG : ‘तू फक्त या ड्रेसिंग रूमलाच नाही, तर येणाऱ्या पिढ्यांना…’, गौतम गंभीरने पंतच्या जिद्दीला केला सलाम!

या मालिकेत स्टोक्स सर्वाधिक बळी घेणारा गोलंदाज आहे. त्याने चार सामन्यांत १७ विकेट्स घेतले आहेत. मँचेस्टर कसोटीत तो सामनावीर ठरला. त्याने एका डावात पाच बळी घेतले आणि शतकही ठोकले. त्याने सांगितले की, पाचव्या सामन्यासाठी इंग्लंडला फ्रेश गोलंदाजांची गरज असेल. कर्णधार म्हणाला, “आम्ही बराच वेळ मैदानावर राहून खूप गोलंदाजी केली आहे. सगळेच थकले आहेत. आम्ही सर्वांचे मूल्यांकन करू आणि पुढील दोन-तीन दिवसांच्या विश्रांतीनंतर निर्णय घेऊ. काही नवीन गोलंदाजांचा समावेश करायचा का, हे आम्ही सामन्याच्या जवळपास ठरवू.”