IND vs BAN Test Series : भारतीय संघाचा स्टार अष्टपैलू खेळाडू रवींद्र जडेजा पुन्हा एकदा कसोटी क्रिकेटमध्ये चमक दाखवण्यासाठी सज्ज झाला आहे. पुरुषांच्या कसोटी अष्टपैलू क्रमवारीत अव्वल स्थानी असलेला जडेजा बांगलादेशविरुद्ध सुरू होणाऱ्या दोन कसोटी सामन्यांच्या मालिकेचा महत्त्वाचा भाग असेल. यावेळी, त्याचे लक्ष्य एक मोठा विक्रम आपल्या नावावर करण्याचे असेल.

भारत आणि बांगलादेश यांच्यातील दोन सामन्यांच्या कसोटी मालिकेला 19 सप्टेंबरपासून (गुरुवार) सुरुवात होणार आहे. पहिला सामना चेन्नईच्या एमए चिदंबरम स्टेडियमवर होणार आहे. आगामी सामन्यासाठी दोन्ही संघ जोरदार तयारी करत आहेत. या सामन्यात 35 वर्षीय अष्टपैलू रवींद्र जडेजाची नजर एका मोठ्या विक्रमावर असले. जर त्याने कसोटी सामन्यात सहा विकेट्स घेतल्यास तो कपिल देव आणि रविचंद्रन अश्विन यांच्या क्लबमध्ये सामील होईल.

डिसेंबर 2012 मध्ये भारताकडून आंतरराष्ट्रीय क्रिकेटमध्ये पदार्पण करणाऱ्या जडेजाने 72 कसोटी सामन्यांमध्ये 294 विकेट घेतल्या आहेत. 300 विकेट्स पूर्ण करण्यापासून तो फक्त सहा विकेट्स दूर आहे. आगामी मालिकेत त्याने असे केले तर तो कपिल देव, अनिल कुंबळे, हरभजन सिंग, झहीर खान, अश्विन आणि इशांत शर्मा यांच्यानंतरचा सातवा गोलंदाज ठरेल.

कसोटीत सर्वाधिक विकेट घेणारे भारतीय गोलंदाज….

1. अनिल कुंबळे : 132 सामने 619 विकेट्स
2. रविचंद्रन अश्विन : 100 सामने 516 विकेट्स
3. कपिल देव : 131 सामने 434 विकेट्स
4. हरभजन सिंग : 103 सामने 417 विकेट्स
5. इशांत शर्मा : 105 सामने 311 विकेट्स
6. झहीर खान : 92 सामने 311 विकेट्स
7. रवींद्र जडेजा : 72 सामने 294 विकेट्स

तसेच, कसोटी क्रिकेटमध्ये 300 विकेट्स पूर्ण केल्यानंतर, कपिल देव आणि रविचंद्रन अश्विन यांच्यानंतर कसोटी क्रिकेटमध्ये 3000 धावा आणि 300 विकेट्स पूर्ण करणारा जडेजा हा तिसरा भारतीय अष्टपैलू खेळाडू बनेल. साल 1983 मध्ये भारताला एकदिवसीय विश्वचषक जिंकून देणारा माजी कर्णधार कपिल देव यांच्या नावावर 131 कसोटी सामन्यांमध्ये 434 विकेट आणि 5248 धावा आहेत. त्याचबरोबर अश्विनने आतापर्यंत 516 कसोटी विकेट घेतल्या आहेत. याशिवाय 100 कसोटी सामन्यांमध्ये त्याच्या नावावर 3309 धावा आहेत. आता जडेजा त्याची बरोबरी करू शकतो.

IND vs BAN : एकाच कसोटी मालिकेत ‘हे’ पाच विक्रम मोडू शकतो आर. अश्विन, येथे पहा संपूर्ण यादी….

सर्वाधिक कसोटी बळी घेणारे डावखुरे फिरकी गोलंदाज

आणखी एक म्हणदे बांगलादेशविरुद्ध सहा विकेट्स घेता क्षणीच जडेजा 300 कसोटी बळी घेणारा तिसरा डावखुरा फिरकी गोलंदाज ठरेल. सध्या तो या बाबतीत चौथ्या क्रमांकावर आहे.

रंगना हेरथ (श्रीलंका) : 170 सामने 433 विकेट्स
डॅनियल व्हिटोरी (न्यूझीलंड) : 187 सामने 362 विकेट्स
डेरेक अंडरवुड (इंग्लंड) : 151 सामने 297 विकेट्स
रवींद्र जडेजा (भारत) : 136 सामने 294 विकेट्स
बिशनसिंग बेदी (भारत) : 118 सामने 266 विकेट्स